團購餐@Joyful Dessert House

這次假E選了Joyful Dessert House團購餐
上回在8月中試食，新開業時間還早吃甜品的人不多，第一次光顧望望餐牌都已經見到啲車軚人推介食物，既然一場嚟到點可以唔叫嚟試下呢
燒菠蘿雪芭，上放咗一片燒過的焦糖菠蘿，面層脆卜卜，雪芭非常冰凍，凍到牙都震

芒果拿破崙上桌時，我們倒是呆了一下，因為真的高大得令我們驚喜，甜品有整個手掌那麼長，由3層酥皮夾著淡甜柔滑的吉士醬，另外還配有juicy多汁的芒果粒及芒果雪糕，酥皮牛油味香濃，表面雖然有吉士醬各芒果層屠相隔著，但沒有絲毫影響，入口依然碌脆鬆化，絕對沒叫人失望，非常滋味

疑似熟客的鄰桌哥哥，佢嘅朱古力心太軟嚟到picture咗之後跟住又問侍應姐姐點樣checj-in & post，原來有一球雪糕送呀，呀哥哥都好有心一個人都咁有雅興，我哋又跟佢玩吓free多球香芋雪糕食吓

上星期六再嚐第二回，今回多咗dinner set及其他小食，嚟到緊係食甜品，今回要熱食
綠茶心太軟伴雪糕，這個又是車軚人推介，不論是雪糕味道、心太軟上的綠茶粉末及碟上的裝飾都用上了綠茶，賣相相當統一，用匙切開綠茶蛋糕唔會太硬流心度適中，還配上粒粒飽滿的紅豆蓉，加上濃郁的綠茶雪糕一同進食，簡直是perfect

雲呢拿梳乎厘伴雪糕，整得好好，焗得夠晒高度，充滿蛋香味，口感夠滑好鬆軟，非常吸引

美中不足的是兩個甜品一齊到，要快手跟假E些牙嚟食咗個梳乎厘，然後慢嘆個綠茶心太軟

又再跌倒了

前天去咗太古城買咗個中秋小食套餐，走出嚟嘅時候，錯怪自己只顧放好食物冇留意地台邊已有警告標貼一不小心平步而下絆倒，今回是下台階左腳先跪在地上，雙手立即按在地上支撐着身體，右腳掌扭傷了少許，好多謝身旁一對年老伴侶雖則他們撐着柺杖未能協助但都輕聲問道:姐姐小心啲有冇事吖呢個地台設計不好，相反遠旁主辦單位的職員只係離遠觀望下而且又不聞不問，唉…呢回為了貪嗰小便宜及想試吓個全城搶購嘅流心奶黃月餅，真係得不償失，收錢嗰個好抵，個流心奶黃月餅都未食呀，嬲極
此回跌一跌憶起上回係眼前一黑及冇留意有一小地台又剛巧左手插在褲袋取電話而又冇防備，所以跌得重啲
還有飲完杯奶茶後已覺不妥整天作嘔作悶及冇晒胃口，晚餐飲咗碗冬瓜湯食咗半碗白飯，晚上失眠整夜未能入睡

就係為咗將佢放入環保袋而令自己跌倒

跌倒當天返回家後右腳掌開始疼痛不能著地，一柺一柺著走路

昨天情況

今天情況好瘀

昨夜失眠，朝早起床感覺身體極其虛浮，避免倒下免強吃了一片麥包，急急走回床上休息，輾轉反側都不能眠一眠補充體力，爬起來預備晚餐在切肉時個胃突然抽住痛，當抽痛時要彎下身子護着他，大半天躺臥床上，身體完全不在狀態，真係想call ambulance入急症室，但當刻情況只得我個人躺在房間及救護站判斷沒有能力開門嘅話，消防爆破隊定必候命破門入屋，唔想搞貢大，於是嘗試預約普通科門診睇下有冇booking，幸好當天下午3:40有空檔，只好硬著頭皮拖着虛弱的身軀往普通科門診求救，實側我都擔心自己有冇能力往返及暈咗喺街就糟糕了，預早出門龜速咁到達門診，剛巧編配張醫生主診，她耐心聆聽我的狀況話可能食咗啲不潔食物絞着肚子當清吓腸胃，今天唔食嘢唔緊要，取藥回家要好好休息，還提醒我現階段應好好保養身體才為最要，忠告我食物攝取係要靠自己必須要有充足的飲食營養，不然嘅話病菌便會乘虛而入拖累了自己身體，感恩張醫生的關懷

既然冒險去門診，為何不去急症室?假若暈倒怎麼辦

 吃過藥後好得多，醫生還多給安睡寧，昨晚冇食亦都唔想食攞咗當食咗

整天只吃了一片麥包，返家順道外賣個粥餐暖下個胃，食咗半碗已冇食慾，個腸粉只好留待明天早餐，吃個藥後休息一會，煮個榨菜肉絲飯比啲大哥大姐晚餐自己就食埋嗰半碗粥，10點鬆啲入睡至2:30，下半場又輾轉反側至天亮
今早起床身體比昨天好得多，昨夜已感覺肚餓，於是翻熱個腸粉又係食半份已冇胃口，不知是否啲虛火關係個口嗰粒大痱滋加上舌邊及牙肉都有痛楚，我又怕失眠影響身體，都係加碼預約中醫調理下，醫師話先治好失眠後再調養身體

苦口良藥，希望幫到我安睡

2點鬆見醫師，4:30才可取湯劑，唯有坐程專線小巴往地鐵站食啲嘢，慢速食完碗粥，有個大叔走埋嚟坐在對面側位，佢一坐下打了一個巨響的噴嚏，全場人都盯著佢，他媽的…大叔還理所當然嗦嗦鼻子然後若無其事食佢嘅餐，這刻左右隔離迴避佢，我真係想比包紙巾佢然後大聲問佢先生你冇嘢丫嗎，心想佢都唔知是否故意…速閃

呢間咁嘅集團連鎖粥麵店，啲外判清潔食具唔乾淨，樓面姐姐只係清理渣滓及將收回啲污穢食具直接放回清潔公司的箱子內，而並沒有先簡單沖洗，啲集團只顧賺錢而啲咁簡單的衛生常識都管理唔到

我前公司係pantry張貼告示要求員工先將食具簡單沖洗，然後姐姐才安排放入洗碗機代為清洗，清洗完畢姐姐定必檢查清楚是否清潔乾淨才安放適當位置

網購-iHerb

又為咗賺埋個折扣獎勵，在last minute又order啲貨品返嚟，雖則有折扣獎勵但要多收運費，換句話說被取巧咗有得有失

1. Thayers, Witch Hazel Aloe Vera Formula Alcohol-Free Toner,Rose Petal(355ml) 金縷梅蘆薈配方, 無酒精爽膚水, 玫瑰花瓣                                                                                                                 *夏天用薰衣草配方比較清爽，秋冬我較喜歡玫瑰花瓣配方
   
2. Acure Organics, Brightenling Facial Scrub(118ml) 亮膚臉部磨砂霜                                                           *幼滑磨砂，假E都話好用再回購
   
3. Now Foods, Solutions Hyaluronic Acid Firming Serum(30ml) 透明質酸緊膚精華素
   
4. Aveeno, Baby Eczema Therapy Moisturizing Cream,Fragrance-Free(141g) 嬰兒濕疹治療保濕霜                     *買比小可愛
   

tea buffet@Sheraton

上個星期老大生日，大家又相約往Sheraton tea buffet

小朋友DIY的birthday cake 

輕輕鬆鬆嘆杯茶

食物質素Good! 

靚太生日歡聚

8月份靚太生日，相約到香港仔如心南灣海景酒店嘆個brunch，由11:30慢嘆至16:00，然後再去海洋公園，渡過愉快的一天

靚太Happy Brithday

餐廳座位之間空間寬敞，這家餐廳推廣香港特色至8月27日，名為南灣茶座，主打金裝奶茶、菠蘿油、沙嗲牛包及炒滑蛋

這裡食物選擇很多

今早未吃早餐，先嚐碗燕麥片粥，然後粟米片、全麥條、雜錦果麥配鮮奶口感豐富
中式點心、自選生滾粥、各式麵包，我不敢吃凍食，有日式刺身及沙律款式多

金茶王奶茶味道甘醇香滑，調較得恰度好處

食飽飽，轉戰海洋公園

  玩至晚上9點多

海洋公園主題沙雕塑好靚及個夏日繽紛遊戲好吸引

好肚餓，10:30晚餐在往銅鑼灣食米線

8月份家常便飯

炎夏的8月，好幾天36度熱氣迫人，又遇幾遇颱風大駕光臨，食西瓜多個食飯

8月1日(星期二) 咖喱三寶雞翼刀削麵、咖喱三寶雞翼烏冬

8月2日(星期三) 咖喱三寶雞翼刀削麵、榨菜雲耳牛肉絲飯、生菜魚肉湯

8月3日(星期四) 雞翼生菜米粉、洋蔥豬扒、淮山茨實粟米紅蘿蔔煲豬橫脷湯

8月4日(星期五) 菜芯刀削麵

蕃薯pancake

8月7日(星期一) 西蘭花刀削麵、豉汁鳳瓜豆卜排骨飯、冬瓜豬潤瘦肉湯

8月9日(星期三) 翠玉瓜刀削麵、雞翼翠玉瓜忌廉磨菇意粉(小姐lunch box)

8月10日(星期四) 西蘭花雞翼忌廉磨菇意粉(小姐lunch box)、淮山茨實螺片合掌瓜湯

8月14日(星期一) 咖喱三寶刀削麵、滷水鴨麵，大佬又有party food拎返嚟

夏桑菊涼茶

8月15日(星期二) 煎雞扒、勝瓜豆腐紅衫魚湯

8月16日(星期三) 咖喱刀削麵、洋蔥豬扒

8月17日(星期四) 榨菜雲耳牛肉飯、番茄雜菜湯

8月20日(星期日) 南乳蓮藕炆鴨、清蒸海班、海皇冬瓜羹
38度高溫下，捧個西瓜返歸消暑

8月21日(星期一) 鮮菇雲耳雞飯、勝瓜豆腐魚頭湯

8月22日(星期二) 刀削麵
小姐減肥行動再升級，逢星期二及四做GYM，晚餐唔好預佢喎，家陣佢day day都有不同的減肥運動

8月23日(星期三) 米粉

8月24日(星期四) 米粉、煎釀涼瓜,三色椒、蝦醬豬頸肉飯、粟米魚肚羹

8月25日(星期五) 夏桑菊涼茶
身體明顯虛弱咗，近來天氣熱多食瓜菜，飲咗夏桑菊及食咗涼瓜，搞到我頭暈暈

8月26日(星期六) 煎釀涼瓜米粉

8月27日(星期日) 福字麵、咖喱蘿蔔炆雞、清蒸紅鮪、淮山茨實螺片合掌瓜湯

8月28日(星期一) 菜芯蝦籽麵、炒飯

8月29日(星期二) 菜芯蝦籽麵、炒銀針粉
配合小姐減肥項目，炒咗斤銀針粉一大鍋，佢packed好帶咗2天lunch box`

8月30日(星期三) 蒜蓉豆豉炒涼瓜、豉汁豆卜排骨飯、番茄雜菜湯

8月31日(星期四) 炸菜雲耳肉餅飯、粟米魚肚羹