浸發冬菇分享篇

今年冇咩辦年貨，過年後見到冬菇big sale，入咗貨，成日買咗啲冬菇珍而重之咁放入密實防潮箱，久而久之會被遺忘，避免被回南潮濕天氣使其發霉，將浸發好的冬菇存放冰格，煮用時解凍便可，分享下浸發冬菇的流程，超級快捷方便

將先冬菇沖一沖水，除去沙塵雜質，隔去水後，再用清水浸20分鐘(若用熱水浸發冬菇的話，冬菇的霉氣味(唔好嘅味道)會困住喺度，揮之不去)

然後倒去浸冬菇水，加入生粉用手抓洗(抓摔過程中可順道清除冬菇的霉味)

過清水2次，繼續加水抓洗乾淨，先用手抓洗，然後逐隻內外摔開，順道清除附著的生粉和穢物及檢查清楚是否清洗乾淨(此步驟可重複多一次)直至浸冬菇水清澈乾淨

沖洗乾淨後加水浸過冬菇面(清洗完啲冬菇又白又滑)

浸過夜(啲冬菇發大厚咗)

將冬菇除去冬菇蒂(唔好浪費啲冬菇蒂，我會留起嚟做上湯/切碎拌蒸肉餅)

將冬菇連同浸冬菇的水放入煲內，加冰糖

待滾後，用慢火炆20分鐘，熄火焗至放涼

隔去水份，今回浸咗38隻，10隻一袋包好，然後存放冰格備用(記得保留冬菇水，呢啲係鮮味的源頭，用來做碗仔翅、炆餸，有冬菇水雞粉都唔洗落)

新會陳皮

月初天氣乾爽，踏入曬陳皮季節，220元有1整箱「權」字的新會柑，另附60元有姐姐代剥果皮，有大量新鮮柑肉淪為垃圾被丟棄在油麻地果欄街頭，甚至有生果檔寫上「益街坊」、「免費自取」，真真正正的「有柑執」
全城熱曬陳皮，各家各戶也忙著曬陳皮，處處都見到有人吊起一串串柑皮，我亦襯熱鬧買咗10多磅玩下

經驗和傳統十分重要，必須考證，中醫師提醒，橙黃色已熟的新會柑曬出來才是真正的陳皮，曬錯綠色青皮柑，破氣疏肝，力猛，久服易傷，青皮曬10年也不會變陳皮，行氣會變破氣，陳皮行氣健脾，平和，不易傷身
秋末初冬果實成熟時採收果皮是最好的，不辭勞苦自家買回來一手一腳天然生曬，自然陳化的陳皮較為安心，最少三年成陳皮才可使用
20元5磅，呢樹68個有10多磅，我比較怕農藥和剎蟲劑，所以用久一點時間來洗刷，買回來後整隻果用鹽水浸2小時，再用清水浸1小時，用牙刷輕輕洗刷表面(1分鐘內完成便可)，然後用濕毛巾抹乾淨

每個柑從尾用界刀割開3瓣，落刀不要太深，不要讓肉汁沾到果皮(若柑汁沾上果皮，曬乾後柑皮會出現黑色一片「燒濃」)，再用茶匙挖出果皮，新手嘅我個多鐘玩完

果皮放在當風處吹乾3小時才反轉柑皮

反覆曬乾1-2週

入罐，以便日後陳放，待天氣乾燥時再曬

物盡其用剩下的果肉，搾汁及做果醬

有3枝柑汁，用嚟煮餸…中式豬扒、酸辣雞扒、炆雞翼

因柑比較寒涼，我在柑汁中加入蜂蜜生薑茶，務求快快清倉

銀魚仔乾

1月11日(星期三) 走出城買餸見個阿太買咗呢款銀魚仔乾佢話好味

檔主問我有冇食個呢款?我話冇大多數買白色嗰款，佢話呢款係鹹淡水嘅銀魚乾價錢貴啲，喺而家呢個當風及天氣好嘅日子才有貨，你冇食個呢買番平啲嘅銀魚乾啦唔好"晒"(浪費)我啲嘢；我話買20元試吓啦，檔主話最少要買4兩65元，20元好難秤架4兩都係兩餐食晒啦；咁唯有買4兩試吓，當晚切啲薑絲放在柳梅絲上面蒸果然好味呀

1月16日(星期一)放排骨面蒸回味嘆吓

1月13日(星期五) 在上環海味街見到想買番4兩，礙於過年時期冷宮爆晒倉，唯有忍手
1月21日(星期六) 在流浮山又見到呢款銀魚乾，雖然顏色唔夠白淨，但價錢只係120元/斤比之前我買嘅65/4兩平咗一半有多，於是便買半斤跟家人分享

石九公魚

大佬個朋友，釣咗好多石九公魚，收穫豐富，叫佢去拎，現在休魚期及臨時街市冇咩魚選擇，啲魚好靚又厚肉，佢朋友又好細心大小27條分開裝比我，我分4份冰鮮咗佢，大條清蒸，細條煲湯，劏咗成個鐘魚呀

來自百度百科資料：
石九公魚為石九公魚屬科的一種魚，學名為褐菖，俗名：石狗公仔，產期：全年有產

石九公魚體顏色呈常褐色，形狀與石斑魚相似，嘴巴寬大，頭部長着一排長刺，故有小石斑之稱，石九公一般生活在海域中的石頭縫或石洞裡，底部小蝦作為食物對象，也吃其他海中微生物，生長很慢，捕獲的一條約半斤左右

Thayers-玫瑰花瓣金縷梅爽膚水

上年11月在iHerb買咗支Thayers-玫瑰花瓣金縷梅爽膚水，用咗大半，現在要補貨才有空報導推介吓，今次買咗5支，要嚟還債

此產品不含酒精及調色劑，美國製造，金縷梅幫助收緊毛孔，令皮膚光滑漂亮，不乾燥

用後發覺控油及保濕效果很好，未試過一定要試，大眾化價錢，高質數產品，現在我已棄用大牌產品

Thayers-Rose Petal Witch Hazel ,with Aloe Vera Formula, Alochol-free Toner, 355ml(THA-07003) 玫瑰花瓣金縷梅,含蘆薈配方,不含酒精調色劑

快樂雞翼

呢個快樂雞翼，係來自江獻珠女士的食譜，珠璣小館–中西合壁家常菜，懷念專敬的江老師
我很喜歡江老師嘅食譜，她精通每種食材，精緻細膩地記載在每篇文章上，對菜式挑選亦非常嚴謹，觀賞後獲益量多

材料：雞翼、檸檬1個(榨汁)、紅蔥頭2粒、蒜頭2瓣、薑2片、冰糖1湯匙
先將雞翼洗淨瀝水備用
把雞翼放入易潔鑊內，加入紅蔥片、蒜片、薑片黑胡椒及冰糖，中火爆炒，然後加頭抽、老抽及檸檬汁拌勻，蓋起轉小火煮20分鐘