自確診患病及術後2年多再次投入全職生活，工作性質唔同咗，最初我自己都害怕能否勝任，但事實證明由10月份開始忙碌至1月初，自己都能應付得到，公司對我好好，已簽咗正式合約，感激不盡，名副其實賣咗身喺呢間公司，希望事事順利
8月23日(星期四) [19/2y52] 專科門診護士來電告知驗尿報告有問題，預約9月13日到日間醫院見醫生， 看看醫生決定會否開藥
9月13日(星期四) [22/2y52] 按指定時間返回專科日間醫院，走進櫃台交出身份證比醫院助理，佢問我嚟睇咩?我話:唔知，係你啲同事call我今日嚟見醫生，接著又問我有冇到會計部比錢?我話:冇(心想當時護士姐姐話上嚟見醫生就得喇)，然後叫我先到會計部比錢，取回收據再上番嚟喎。還好我預早20分鐘到，醫院啲lift都幾繁忙吓，會計部又多人，來來回回折騰咗差不多15分鐘，重新返回在櫃台登記，取回預約便條，安排在電視室等見醫生
足足等咗差不多2小時才會見醫生，戴醫生問吓病程，我如實告知，她才說上回檢驗結果是擬似個案，佢話:咁我開唔開藥(抗生素)比你吖?我話:是回驗尿是否立即知道結果，她說:不是，我話若然結果又有問題，那怕我又要請假來取藥?她是個年青新晉醫生，還笑著說:咁我寫你有少許問題，開啲藥比你啦，實則唔好咁依賴抗生素呀，我話:好吖，講句唔該晒便離開了
看看時間快到17:00，本預時間寬鬆的我還往藥房取藥，從護士處取回到診紙及藥單，急趕往取藥後，然後打的跑第二輪見牙醫
9月17日(星期一) 超強颱風後的早上，從新聞看見各區倒樹及交通混亂，為免耽誤時間，須則早上10:00會見耳鼻喉科醫生，我亦8點多出門，街上滿是倒樹，M線接駁車頻密，到了地鐵站，唯一醫院接駁專線大排長龍，只好步行前往，行至半途至長命樓梯前，幸好上咗架專線小巴到醫院，否則要爬超長樓梯及至出口處有倒樹要爬樹
在中央登記處交妥錢後，自己扮醒目撕下回條，然後到專科門診，為何找不到box投下預約紙?走到護士站問過究竟，護士姐姐問邊個撕下回條?我話:我自己，護士姐姐話，:坐下等叫名就可以，忘記咗呢個專科是全面電腦化又準時，與預約時間相差不到15分鐘便可見醫生，黃醫生核對身份證及文件後，問問近況如何?我話:最近覺得味覺差少少，還有少許舌邊麻痺，例行檢查過後，醫生話:檢查目測冇問題，舌邊麻痺可能是神經線問題，攞啲漱口水，下回2個月後回來覆診，呢個醫生又幾細心及觀察入微
9月20日(星期四) [23/2y52] 心情靚靚的一天，期待已久的牙齒修復工程終可圓滿煞科，今天裝置植齒牙冠，裝好後感覺真原裝牙齒一樣，從此無後顧之憂，爽呀
陳醫生力求完美今天整個團隊為我超時，完成後陳醫生還細心叮囑日常口腔清潔，好好感受這副牙齒的好處，衷心多謝陳醫生悉心照料及為我裝上極緻完美的牙齒
9月23日(星期日) 滿以為平安無事，怎料又再跌倒，事因超強颱風山竹大駕光臨，強風越吹越勁，我房間冷氣機窗台側的膠邊日久失修，膠片被強風攻破了，幸好是膠片，只是風沙飛麈不斷從空隙吹入，簡便地清理好，待星期日自己拆除膠片清洗及清掃窗台日久的灰塵，來來回回三幾遍，到了最後放回已清洗好的膠片時，從窗台踏上椅子落回地面時，一下子踏空，先整個人跌坐在地上，已是坐下來，不知為何繼而向後翻，後腦著地'滂'的一聲嚮，頓時腦海一片空白，天旋地轉，以為自己今次跌死咗…驚驚吖，已是第三次跌倒，真的要萬事小心
9月24日(星期一) [24/2y52]中秋夜，赤腳在apartment踢向櫈角，頓時痛到入心，玩至半夜指背極痛至不能入睡要輕手按摩痛楚處，早上要拐著行，在apartment的按摩椅玩咗15分鐘，舒緩了很多，右腳第二及三隻腳指及關節位碰瘀咗，返回家已18:00極速梳洗後食粒止痛藥便倒頭大睡，叉足12個頭電才有氣力上班，真的是年紀大唔捱得夜，要慢活
10月9日 [26/2y52] 工作開始比較繁忙，OT1個鐘
11月5日(星期一) [29/2y52] 泌尿科第一次會診，這個是內科專科樓層，整個等候區都迫得水洩不通，正坐著前面有3個阿太還高談闊論七嘴八、舌滔滔不絕講過不休，我待著1小時耳朵多受罪，泌尿科只有3個診症室，陳醫生是副顧問醫生，還要在用布簾隔開3個位置的角落為我應診，房間非常擠擁及沒有私隱，隔鄰房間還坐著幾個實習醫生旁聽
陳醫生斯文有禮，先道出上回超聲波結果話:右邊腎冇問題，但意外發現左邊腎有1細少黑影，通常不大過7mm就冇問題，穩陣啲照多次，睇多次結果，我連隨話:現在工作開始忙碌，無暇處理，要待2月才可鬆閒些，陳醫生多好，佢話就不如3月啦，超聲波照過，做CT比較好，我話上回對顯影劑敏感，手腳關節位置出粒粒，佢望一望電腦話:依…冇記錄喎，我話:上回是在ST.PUAL做嘅，CT+MRI，我還特意跑回普通科門診就醫，醫生還給我類固醇藥膏，應有記錄在案，陳醫生話:咁唔知邊種顯影劑對你有敏感，因2種都唔同，又無記錄，今回先拿預防敏感藥按指示服藥後才照CT，然後要簽同意書，接著護士姐姐話:外邊等
我講聲唔該晒後，在診症室外罸企咗10多分鐘，皆因呢個專科睇完醫生都要按醫生指示往不同部門做化驗，文件又多，而且大多都是上咗年紀嘅伯伯求醫，往往見完醫生後睇唔明啲文件又跑回頭問過究竟，護士姐姐亦不厭其煩地重複又重複問完醫生後講解，應診室門外總是推著一群人在等候
我拿著文件先交藥單，然後往抽血驗腎功能，今回眼見前面有2位小學生，有位妹妹因年紀輕血管幼很難找到適合位置抽血，護士姐姐哄著哄著抽血後給卡通膠布，媽媽攬護著小女孩只好輕聲哭泣抽咗多瓶血，及另一位男孩在等候其間只顧玩耍遊戲機，媽媽突在其身後搶回遊戲機及大聲駡著他的兒子，男孩亦沒有生氣欣然接受勇敢面對，呢位小孩子又抽咗多瓶血，而我每次抽血亦沒有小孩子般勇敢，總是閉上眼不敢回望。抽血及尿藥後，再跑往對面中央大樓預約照CT，這邊是急症部門專用，登記處分配好時間後，交給特約員工講解時間及注意事項，搞東搞西整個下午連午飯都未食
11月13日(星期二) [31/2y52] 耳鼻喉科覆診，今回見顧問唐醫生很詳細，首先問:舌邊有冇麻痺，我話:冇，用咗漱口水後好好多，然後問:聽覺有冇問題，我話:又係咁，唔覺有咩嘢，唐醫生好慢條斯理好似搵緊我有啲咩問題，我話天氣關係近來啲鼻敏感藥要接住食無停個呀，隻新藥雖則唔眼瞓，但我總是覺得傳統嗰隻效果好啲，醫生問:是那一隻呀?我話:即係眼瞓嗰隻囉，然後例行檢查下，接著話:耳膜穿咗，做唔做手術呀?我話:吓，學生年代做過2次失敗咗無理佢，現在事隔多年，又剛做完大手術康復中，我唔知呢個手術我自己身體能否應付到喎，而且現在又發現左邊臂有細小黑點待3月照CT，醫生冇回應手術問題話搞掂腎先啦，於是我問下次幾時覆診?佢話:4個月後，取過藥單講聲唔該就完結咗呢次會診，摸不著是否需要做手術
11月20日 [32/2y52] 工作狂嘅我由差不多朝8晚8忙碌著，就連午飯用餐頂多半小時而已，然後又開工，每天工作差不多企足12小時，呢回真正感受到倦極了
1月19日(星期六) [40/2y52] 正值流感高風期，感覺鼻癢癢、頭重重及氣管不舒服，多飲熱檸樂煲薑舒緩吓好好多，近來冇煮飯唔知米貴，便利店要10多塊錢1枝可樂，肉赤呀
2月12日(星期二) [44/2y52] 覆診日，何醫生會診先講:上回報告冇問題，然後話尿道感染食藥後好啲嗎?我話:冇事(查實我攞藥後等待化驗結果，冇問題就冇食藥)，醫生再問有冇呢啲嗰啲問題，我都話:冇，但仍然是右下腹有些少痛楚及左邊腎有小黑點待3月照CT，佢話:泌尿科跟進臂臟問題，然後又例行檢查，心想事隔半年覆診真的害怕檢查痛楚，何醫生須則是新晉醫生溫文有禮又細心，今回唔痛，而且做每個步驟都知會聲，多好，檢查完結返回坐位，取回覆診紙講聲唔該晒走人，24-28個星期後例行檢查
沒有留言:
發佈留言