今年自己親手做酥皮奶皇月餅，新鮮出爐比街買的名牌月餅出品更好吃，整咗3轉共128個，第三水成績最好，總結吓心得
第1水45個，心急，自農歷年嗰焗椰汁年糕出爐後，8個多月未用過焗爐，生疏咗，爐溫控制不佳，開工唔順利，個月餅模又爛咗，訂咗月餅包裝用品遲遲未發貨
呢樹大姐24個，二姐20個，自家食咗個
9月6 日開始準備材料
嘗試學習用慢火煮奶皇餡代替傳統蒸煮法，效果唔理想，可能未能掌握好時間控制，餡料較為瀉身
冇用電動攪拌器混和餡料及餅皮，效果不理想
第2水43個，較為理想
每轉都出城扥啲蛋返嚟，1隻鹹蛋未除包裝重110克，上轉買咗20隻都好重，今轉只買10隻
用咗電動攪拌器幫助攪餡料及餅皮，成品較為理想
訂咗月餅包裝用品遲遲未發貨，還好早早買咗蛋糕紙扥，即時摷哂啲月餅盒出嚟，呢樹裝20個比靚太，佢大讚環保
用月餅內盒加面蓋，呢樹又裝20個比老大
第3水40個，用傳統第一代品牌配方加做法，最妥當
今轉又買20隻鹹蛋
室溫放3天後，吃不完要放入雪櫃內，記得用焗爐焗熱吃，以160度焗6分鐘，唔好用微波爐，會叮到腍哂，冇咁好食
同樣用月餅內盒加面蓋，面層舖保鮮袋，呢樹20個比假姨
呢樹裝9個比大姐
奶皇餡：低筋麵粉18克、吉士粉18克、奶粉18克、椰子粉18克、雞蛋30克、煉奶23克、糖60克、椰漿90克、花奶7克、牛油45克、鹹蛋黃6隻
鹹蛋黃
用1茶匙玫瑰露酒撈勻，蒸20分鐘，隨意不規則壓碎備用
將低筋麵粉、吉士粉、奶粉及椰子粉混合過篩，加入雞蛋、煉奶、糖及一半的椰漿，擄勻後再加餘下的椰漿及花奶撈勻，然後加入牛油(不用撈勻)，滾水蒸20分鐘，取出待和暖後，加入已壓碎的鹹蛋黃，用電動攪拌器搓揉至滑溜，冷卻後放入保鮮袋包好，放雪櫃冷藏一晚
月餅皮：牛油130克、糖60克、雞蛋22克、花奶25克、低筋麵粉252克、吉士粉17克
牛油室溫至軟，加入糖用攪拌器打至牛油鬆軟，然後加入雞蛋及花奶拌勻後，逐少加入己過篩的低筋麵粉及吉士粉搓勻沒有粉粒，放入保鮮袋內，放入雪櫃冷藏至少1小時
取出已冷藏一晚的奶皇餡，我先秤好1個約10個份量的粉糰，再略搓勻，然後切割10份，磅重搓圓，用保鮮袋隔著做方便些(呢個步驟可隔晚做)
將月餅皮隔著膠袋擀薄圓後(中間厚，邊皮薄)，包入奶皇餡，揑好收口，搓圓至沒有裂紋，月餅掃上少許高筋麵粉，光滑一面向下放入月餅模內，把底部按壓平坦，放在枱上，用陰力向下按手掣10秒，定好型後，提起模具，按下手掣出模，將月餅放回雪櫃冷藏至少1小時(定好型後，放回雪櫃冷藏，奶皇餡在焗時減慢溶化速度)
預熱焗爐250度，中層以250度上下火先焗8分鐘，(首8分鐘，必需以高溫使外皮熟透，和時間競賽，要在奶皇餡溶化前，使外皮硬化)，取出薄薄掃一層蛋漿，吹乾待涼10分鐘後，放回焗爐內以230度焗5分鐘，重複以上步驟做1次，此時要留意爐溫，若出現象腳，應調低爐溫或開少許爐蓋散熱(中途需要取出降溫，以防止奶皇餡膨漲撐爆餅皮)，取出，最後掃一層糖漿(不用溝水，能令糖漿變成焦糖，有助花紋更易上色)，焗5分鐘，取出，放在架上完全放涼後才可包裝
