酥皮奶皇月餅

昨晚做預先做好奶皇饀，今天自家做咗45個酥皮奶皇月餅，post咗製成品，個個舉手搶住要，家用式焗爐，時刻要顧住爐溫，又要搓皮包饀入模及存放雪櫃定型，有限資源下，呢幾天要密密做，趕出貨呀

今水呢轉月餅唔順利，個圓形月餅模爛咗，幾經困難做咗12個

轉款做埋餘下嗰啲

星期一在淘寶訂其他貨已經收到，唯獨是月餅包裝用品切實需要的至今還未發貨，激氣，趕不上包裝送貨
這回淘貨不理想，訂貨注明35g月餅模，貨到係50g，算吧，剛好個圓模爛咗，而個人喜愛圓模易操作

近日天氣不穩，整個星期下著雨，前天到二記買材料預備做月餅，昨天老早跑出城託咗20隻咸蛋反嚟做奶皇餡，今年第一轉出爐月餅前後3日時間

材料

奶皇餡：雞蛋1隻、蛋黃2個、糖90克、吉士粉50克、奶粉60克、椰漿110克、淡忌廉80克、牛油50克

先將雞蛋及糖50克打勻，逐少加入已過篩的吉士粉及奶粉拌勻
椰漿、淡忌廉、糖40克及牛油放入易潔鑊內中火煮至有微煙，將雞蛋糊倒入鍋內拌勻，轉小火邊煮邊攪煮至乾身

鹹蛋黃8隻，用1茶匙玫瑰露撈勻蒸8分鐘，壓碎後加入奶皇餡搓勻

月餅皮：牛油130克、糖50克、雞蛋24克、淡忌廉25克、低筋麵粉250克、吉士粉24克

牛油室溫至軟，加入糖用打蛋器拌勻，加雞蛋拌勻，加淡忌廉拌勻後，逐少加入己過篩的低筋麵粉及吉士粉，搓勻

搓妥放雪櫃冷藏

我先秤好1個約10個份量的粉糰，然後切割10份，磅重搓圓，用保鮮袋隔著做方便些(呢個步驟可隔晚做)
將月餅皮隔著膠袋擀圓後，包入奶皇餡，放入月餅模定好型後，放回雪櫃冷藏至少1小時

取出噴水，將月餅放入已預熱220度的焗爐，先焗5分鐘，取出掃第一轉蛋液，吹乾後，放回焗爐焗5分鐘，留意有否象腳或龜裂，若出現象腳或龜裂，可調較焗爐溫度至200/210度，重複多1次及留意爐溫，然後掃糖漿，焗5分鐘