遲來的新春報喜

成個月冇爬上來，報導吓農曆年的概況，同樣是離不開…食，但是今年流感來得勁，家裡各人同樣相繼病倒，做咗口罩黨！

今天是正月十六，元宵節都過埋，真的是遲來的新春報喜

元宵節湯丸

我今年計劃預早購買年初二開年嘅嘢…本想騰空一丁點兒時間休息，同樣由年廿七玩到年初四，稍回氣，又斷續…食

流水篇(流口水篇就真！)
年廿七買咗海蝦、花竹蝦、雞、年藕、慈菇、長紹菜及生果預備團年，花竹蝦預留開年餸菜用，拜神祭祖後，到老大家火鍋慶團年

海蝦及花竹蝦每樣買咗8隻

宅年用品預購多份給老大

年廿八買定豬手及生果

年廿九買咗魚、生果，避免明天街市又迫又人多，仲要好似搶咁一樣買嘢

年卅呢己跑三回，買咗雞、蠔、芹菜、生菜、菠菜…晚炸粉絲、腰果及浸冬菇

我家的過年齋要炸粉絲

左邊3包腰果比較好，右邊嗰包係B媽買嘅

左邊B媽買嘅出水後，水嘅顏色混濁及易燶

炸咗3磅腰果比咗2樽B媽

年初一，6點起床，炆冬菇，其實預早浸咗一口小冬菇，想起年初一用，晚上速浸回大一點冬菇，要早點起床剪腳及清洗，pack腰果、炸粉絲、炆好的冬菇及洗好的菠菜，在冰箱取回豬手及魚放回儲存格解凍。拎埋3斤蠔、2斤菠菜及炸腰果，11點多到達老大家煮過年齋，我家的可愛大帝，嚷著要腐乳伴飯。飯後回家，先將豬手洗淨及出水，放涼，預備年初二嘅開年祭品

2斤菠菜

3斤蠔

我家的可愛大帝，嚷著要腐乳伴飯

年初二，5點起床煎魚、蒸雞、發菜冬菇蠔豉及蝦，8點多己到達荃灣準備開年祭祖事宜，順道到齋堂用膳，今回齋堂新人事新作風，將另文報導吓，各人初二多節目

年初三高興團拜在大姐家

年初四到老大家煮開年飯

鹹蝦膏爆豬肉

這個是家母傳承，傳統做法肥肉多些、手琢豬肉及多油，還有家母是用瓦砵及豬油慢火爆炒。我已減少肥膏及油的用量，傳統做法是必然絕對真正的美味

材料：鹹蝦膏、腩尾肉、乾蔥(切碎)、蒜蓉、片糖(切碎)

鹹蝦膏先蒸15分鐘(蒸軟方便爆炒)，中火下油爆香蒜蓉及乾蔥碎，加入蒸軟的鹹蝦膏，灒酒，沿鑊邊下油慢火爆炒至完全混合(鹹蝦膏吸油)，加片糖碎拌勻，盛起備用
另熱鑊下油爆炒攪碎的腩尾肉，然後加入已爆炒的鹹蝦膏，慢火爆炒至豬肉熟即成

*我通常在大澳買馳名的鹹蝦膏，每次做一整磚份量，配肥腩尾肉1斤(攪碎)及片糖1片(切碎)，調味剛好，做好待涼後放入密實樽內儲放雪櫃，可隨時使用

多煮洋蔥蒜片

臨近廚房歲晚收爐，趕快update吓呢兩個星期嘅晚餐

1月25日(星期日) 蒜片西蘭花、茄汁洋蔥豬扒、蒸鹹魚

1月26日(星期一) 麵醬煮蓮藕、洋蔥火鍋肉片、番茄肉片螺絲粉
備好料，小姐發燒，煮個螺絲粉比佢，吃罷叫佢速上床休息

1月27日(星期二) 清炒翠肉瓜、蒜片西蘭花、豉汁蒸排骨

1月29日(星期四) 沙茶醬炒芥蘭、榨菜蒸肉片、芫茜鯇魚尾湯

小姐病後，咳到飛起，近來多煮洋蔥蒜片剎吓啲病菌，滾個莞茜湯，希望對佢有幫助

2月1日(星期日) 蒜蓉生菜、拜神燒肉,雞、鹹蝦膏爆豬肉、清蒸紅鮪、西洋菜湯
很久沒有煮鹹蝦膏爆豬肉，我通常多煮些，留待撈飯，美味

2月3日(星期二) 南乳炆齋、番茄炒蛋、美極煎豬扒

2月4日(星期三) 蒜蓉豆苗、沙茶醬翠肉瓜炒火鍋肉、生菜魚肉湯

2月5日(星期四)：蒜片翠肉瓜、芋頭臘腸雞粒飯、鹹魚頭白菜湯
係時候要清理吓雪櫃，摷到鹹魚頭，就滾個湯

2月6日(星期五) 肉絲粥、炒麵