7月份家常便飯

天氣熱，整個月大多湯粉麵作午餐，今個月多煲合掌瓜湯

7月3日(星期日) 冬菇雲耳雞飯、合掌瓜粟米紅蘿蔔湯
今晚早啲煮好飯，食飽飽，出門到韓國旅遊

7月10日(星期日) 鹹魚肉餅飯、合掌瓜粟米紅蘿蔔湯

韓國旅遊期間，大佬拎咗條鹹魚返嚟，幾天放在廚房冇人處理，返家開廚房門，整間廚房充滿強烈的鹹魚味，今晚速速處理，切件後包2件B媽，今晚食件放肉餅上蒸

7月11日(星期一) 日式炒烏冬

7月12日(星期二) 豉汁排骨豆卜飯、冬瓜豬膶瘦肉湯
患病後個人已戒食咗啲唔健康的食物，飲食更加比以前清淡，面青青，今晚買咗豬膶嚟補吓血，只飲湯，不知是否心理影響，過後肚子有點不妥…驚驚

7月13日(星期三) 午餐肉粟米意粉，加幾片ham比自己

7月14日(星期四) 榨菜雲耳肉絲飯、合掌瓜粟米紅蘿蔔螺片湯

7月17日(星期日) 什菇芝士粟米意粉

7月18日(星期一) 蝦乾鹹魚飯、滷水雞翼、冬瓜雜菇湯

7月19日(星期二) 日式炒拉麵、番茄雜菜湯

7月20日(星期三) 乾蔥豬扒飯
為咗煎香啲豬扒，燙傷到隻手，少肉多菜餐，加啲白菜比自己

7月21日(星期四) 鹹魚肉餅飯
之前打斧頭的雞脾要清倉，佢哋食鹹魚，我食雞脾，還加啲娃娃菜比自己

7月24日(星期日) 節瓜腐竹紅衫魚湯
餘廚精選 - 大佬拎咗啲咖哩豬皮蘿蔔及滷水雞翼返嚟，我只加10元魚蛋翻熱又一餐

7月25日(星期一) 雞脾菜芯飯，今晚個迷你電飯煲開光，15分鐘煮好飯，快靚正

7月26日(星期二) 黑椒牛仔骨飯、番茄雜菜湯
牛肉係大佬嘅飛佛，不吃牛肉嘅我，雞脾涼瓜飯面蒸，食咗幾餐雞脾呀

7月27日(星期三) 蜜味雞翼飯、勝瓜什菇紅衫魚湯

7月28日(星期四) 榨菜雲耳肉絲飯、合掌瓜粟米紅蘿蔔湯
備好料煲湯，呢個嗰個唔返嚟食飯，扣起條魚，煮好飯大佬棄湯食飯，剩餘啲湯明天煮蕎麥麵

7月11- 20日~1人前精選
11/7 餃子菜芯韓國酸辣麵、12/7 粟米菜芯米粉
13/7 番茄雜菜通心粉 、14/7 豬膶瘦肉通湯通心粉、15/7 西蘭花通心粉
18/7 白菜韓國酸辣麵 、19/7 餃子西蘭花米粉、20/7 餃子白菜蕎麥麵

7月21-29日~1人前精選
21/7 餃子白菜奶油麵、 22/7 娃娃菜米線、 23/7 娃娃菜炒上海麵
24/7 滷水雞翼瑤柱麵 、25/7 節瓜蕎麥麵、26/7 涼瓜公子麵

27/7 魚丸涼瓜米線 、28/7 魚丸菜芯蕎麥麵、 29/7 合掌瓜湯蕎麥麵

我的抗病歷程~覆診3

6月8日(星期三) [8/52] 昨天覆診醫生快速測檢，忘記跟醫生講心噗蹼跳減少咗，但心口有翳悶及壓迫感‥注意

6月18日(星期六) [9/52] 這個星期心口仍覺得唔舒服，大多早上起床及晚上睡覺，晚上若側睡，心口有壓迫感? 是否心臟病

6月27日(星期一) [11/52] 持續心口有壓迫感及頸肩膀痛，煲咗粉葛湯祛濕及去骨火，考慮是否應看醫生或下星期旅遊回港處理

7月6日(星期三) [12/52] 從星期一零晨機到達韓國後馬不停蹄地遊玩，在航機上穿上壓力襪感覺多好，及後兩天當地還下著大雨，只是星期二那天穿上壓力襪在多走路情況下雙腿沒有那麼倦。旅遊期間，提高警覺，保持飲食清淡。4日及6日最高紀錄為步行16566/9.36公里。整體步行多於10000步，會感覺疲倦些及大腿內側麻痺
7月10日(星期日) [12/52] 韓國回來後直往大姐家，只睡5小時便起床跟小可愛上興趣班，飲茶後往小可愛家，晚飯後拖著疲倦的身體回家，返家後將個人及行李大清洗，搞妥當後便睡覺。隨後兩天睡至中午才起床

7月19日(星期二) [14/52] 天氣悶熱，頭痛及心口翳痛，要食止痛藥
7月20日(星期四) [14/52] 持續頭痛，右邊眼連耳骨痛，又要食止痛藥及滴耳水
自天氣悶熱及感心口翳痛後，晚上睡覺時多開冷氣2小時，然後調回風扇吹風，心口翳痛沒有再發生。滴耳水後再沒有耳痛及頭痛減少

7月26日(星期二) [15/52] 術後第三次覆診，不知何故，昨夜睡不安穩，輾轉反側至清晨五點，小睡4小時便起床梳洗，食兩片果醬麵包及飲盒鮮奶便往覆診。天氣不穩，早上天文台懸掛1號颱風及雷暴警告，唯有早點出門
11:20已到達專科門診，待著個多小時才會見醫生，心想距離落班午飯時間還剩半小時，今回那怕又是匆匆趕趕，還好步進診症室，已經看見大Sir(主管醫生)，會心微笑便跟鄧醫生說:身體已經好得多，他也微笑道:比上次還好嗎? 我說:當然，多謝你們悉心照顧呀。隨後他開始講解之前驗血及小便報告，他解釋詳細得多，原來發現血色素只差0.5才合格，建議食補血藥，另小便有少許血清，可能是傷口未康復滲血所引起，建議今回再驗小便。心想…上回那個趕收工嘅醫生又話報告冇問題? 我在唔想影響醫生跟進病情下，亦冇跟鄧醫生說，只是跟他說:雙腿內側仍感覺麻痺。鄧醫生問道:感覺比以前好，還是沒有不大進展? 我說:比以前好，只是步行或坐得耐啲，感覺麻痺多些。他說:要時間適應，為咗手術，已犧牲咗啲淋巴腺組織，麻痺在所難免，我已是癌症病患最最早期，故病理緊密追蹤至少兩年，還叮囑這兩年追蹤最重要，確保癌症不再復發，及說出通常復發的兩個位置，要多加注意。今躺是術後3個月要挖取組織化驗。我內心極不願意挖取組織，為了健康，忍痛罷。也沒有跟他說外遊事宜，還好鄧醫生經驗多好，整個過程不太痛楚，詳細檢驗完隨後說:幾好。之後取覆診信、化驗單及藥單，他還再次叮囑下回覆診前兩天先往抽血，看看血色素正常與否? 感覺幸運再次遇上大Sir為我覆診，今回連帶護士姐姐也很細心。亦多謝老天爺的看顧，自家調理好身體，快快擊退病魔

56天療程的補品

合掌瓜粟米紅蘿蔔螺片湯

夏天多瓜菜湯水，今個月最煲得多係合掌瓜湯

合掌瓜滋補解燥、助腸胃消化，又不太寒涼，煲出來的湯清甜美味，今次我配幾片乾螺片，有清熱潤肺，亦能補益氣血，感冒期間就不宜用螺片，可用瑤柱代替

材料：合掌瓜1斤、粟米、紅蘿蔔各1條、淮山、茨實各30克、乾螺片3片、蜜棗3粒、瘦肉300克(可用排骨代替)、果皮

先將乾螺片洗淨，用開水浸至少3小時後連水放回湯料內，可隔晚預先準備，放入雪櫃冷藏，備用。合掌瓜洗淨，連皮切塊。粟米先去衣除去粟米鬚洗淨切件，紅蘿蔔去皮洗淨切件，淮山、茨實洗淨浸水1小時，蜜棗洗淨，瘦肉洗淨後汆水備用，果皮浸軟
果皮及隨凍水放入煲內，水滾後將餘下的材料放入煲內，大火煲半小時，轉慢火煲2小時

豪哥生日快樂

上個星期五出外跟豪哥慶生，簡單90分鐘圍爐食火鍋，潮興嘅嘢，任飲任食，聯合國火鍋精選，有肉有菜有甜品樣樣齊，我呢啲慢活嘅人，坐下已不停食食食，飽到抱著肚子，最後都唔夠時間食甜品呀

下集…星期六約埋二姐，佢又係呢個月生日，到大姐老家下午茶。天氣酷熱，然後簡單食個溫馨嘅家常便飯，只有雜菜煲、肉絲炒年糕及白飯自煮外，其他係外賣，大姐買咗燒肉、叉燒、生炒骨、椒鹽雞翼及豬扒，當晚大小共8個人，邊度食得晒呀

好飽，最後要call埋小馬爸媽上嚟食蛋糕呀

清暑袪濕糖水

近期天氣酷熱，適逢大暑，煲番個冬瓜袪濕糖水清吓暑

買包袪濕料加件冬瓜，約1斤多，大/小暑菜檔通常附送蓮葉，最好買老身嘅冬瓜
簡單袪濕材料：蓮蓬、蓮葉、木棉花、燈芯草、生熟薏米、赤小豆、扁豆、川皮癣
功能：清熱、利濕、解毒。木棉花還有止血、治療惡瘡、慢性胃炎及胃潰瘍等功效

先將袪濕料清洗乾淨後，浸半小時。冬瓜洗淨切件，保留瓜皮及瓜囊。所有材料放入高速煲，煲好後，乾品蓮蓬及木棉花煲過後會發大，而且又佔整煲食材的位置頗多，避免加重冰糖的份量，我個人習慣先拎起煲過的蓮蓬及木棉花，最後加冰糖，高速煲再調校reheat功能，排氣煲10分鐘即成

煲好我連食材飲咗兩碗，夠晒消暑。裝杯比小姐跑完步返嚟消暑，剩餘嘅待涼裝好放入雪櫃，最好食晒啲冬瓜，避免變壞，冬瓜及豆類要個別盛載放入雪櫃

題外話，星期三煮豬扒飯時，想美味些，將豬扒先煎香佢，然後蓋上鑊蓋又焗吓佢，點知揭開鑊蓋時，隻手唔小心hi咗埋去，嘩…隻手即時赤赤痛，即刻擺隻手去水喉度降溫，然後立即擦保膚靈，隻手又紅又腫

大姐生日快樂

祝 大姐生日快樂、身體健康

相約大姐一家星期日到韓國旅遊，大姐提前昨天請我們食飯，她很開心今年正日在韓國慶生，我們嘻嘻哈哈愉快歡度過

6月份家常便飯

現在多用電飯煲煮一鍋飯連餸嘅簡單晚餐，一家便宜兩家着，小姐既可有lunch box，而大佬個懶人又喜愛有味飯，近來天氣熱，未嘗是好事，唔洗在廚房熱騰騰出大汗煮餐飯，這是我重返煮場嘅傑作

6月1日(星期三) 晚餐肥牛炒日式拉麵

6月2日(星期四) 晚餐餃子菜芯米粉

天氣熱，出城買餃子皮，做咗60隻餃子

6月3日(星期五) 冬瓜紅衫魚湯

 大佬去咗日本旅行，我跟小姐KO咗呢煲湯

6月4日(星期六) 十隻餃子的午餐

6月5日(星期日) 晚餐梅菜肉餅飯、淮山玉竹無花果蘋果湯

6月6日(星期一) 午餐餃子一人前

晚餐日式肥牛飯、茄子飯是我的(原來我唔可以食茄子，是具有發毒的食物…驚驚

6月7日(星期二) 焗豬扒飯(外賣)
是日覆診後買個焗豬扒飯做午餐，個飯外觀唔錯，但內裡是凍嘅，啲飯又硬及味道並不討好，還有我食後肚痛…怕怕，唔會再光顧這家黑店

6月8日(星期三) 今天玩自製魚丸

晚餐魚丸小棠菜瑤柱麵

6月9日(星期四) 午餐魚丸小棠菜炒上海麵

晚餐冬菇雞飯、拜神燒肉、鮮蔬冬瓜紅衫魚湯

是日端午節，買條燒腩骨要100元，我飲完兩碗湯後，只剩下4件

6 月10日(星期五) 魚湯魚丸米通粉 (打斧頭咗魚湯煮米通粉)

晚餐，小姐現在每朝自己處理lunch box嘅蔬菜，佢話今早廚房疑似有蜜蜂，所以連忙關廚房門走人，留下手尾…浸咗西蘭花及lunch box都唔拎啦，驚驚喎，個lunch box做咗我晚餐

6月12日(星期日) 晚餐金菇雲耳雞翼飯、四神排骨豬肚湯

6月13日(星期一) 晚餐魚肉炒銀針粉

6月14日(星期二) 晚餐豉汁排骨鳳瓜飯、鮮蔬冬瓜蜆肉湯

6月15日(星期三) 午餐娃娃菜公仔麵，久別重逢呀，60天冇食公仔麵啦

晚餐三鮮肉餅飯、番茄雜菜湯

今天呢兩餐罪惡極…公仔麵+三鮮肉餅(瀨尿蝦乾,蝦乾,鹹蛋)

6月16日(星期四) 晚餐雞脾飯
星期一買咗個迷你電飯煲，冇check貨，昨天想用嘅時候，比我發現煮飯外殻有刮花的痕跡，今天又要跑出去換貨，搞得嚟都好晏，又想食飯，今晚獨自一人前，唯有煮1杯米分2餐食啦

6月17日(星期五) 晚餐黯然銷魂飯
剩飯變奏曲，加隻煎蛋、叉燒及煲仔飯豉油，咁就變咗食神推介嘅超級無敵黯然銷魂飯啦

6月19日(星期日) 晚餐榨菜雲耳肉絲飯、節瓜腐竹馬友魚湯
又嚟打斧頭啦，我將條較大嘅馬友先起肉，兩片魚肉留待下餐蒸飯，剩餘的魚頭、魚骨及魚肚先煎後拆肉嚟滾湯，而每次滾魚湯，我都扣起一碗留待用嚟煮米粉，又有魚肉食，一魚幾味，真係五窮六絕嘅招算都出埋吖

6月20日(星期一) 午餐魚湯魚丸娃娃菜米通粉 (星級打斧頭嘅湯粉)

晚餐日式肥牛炒拉麵、勝瓜腐竹馬友魚湯

勁慳家魚湯，每次滾魚湯，將魚先煎後拆肉，又有魚肉食，一魚幾味

6月21日(星期二) 晚餐洋蔥雞翼飯、淮山茨實粟米紅蘿蔔豬橫脷湯

6月23日(星期三) 晚餐榨菜雲耳肉絲飯、番茄雜菜湯
慳列絕系列…加片星期日打斧頭嘅馬友魚肉比自己，還剩一片留待下餐，洗唔洗咁慳呀

6月24日(星期四) 晚餐洋蔥豬扒飯、節瓜鹹蛋肉片湯
這個星期多滾及煲湯，配合小姐減肥至高境界，佢呢湯渣除咗肉之外，多多都會同你清倉，有啲湯及瓜菜食吓，好過晚上冇嘢落肚吖　

6月25日(星期五) 晚餐餃子魚丸白菜態本拉麵

6月26日(星期六) 午餐馬友魚肉飯、涼拌青瓜
自術後，若斷飯一天，個人感覺唔夠氣力，現在每天都要食飯

6月27日(星期一) 晚餐豉汁排骨鳳瓜飯、粉葛粟米紅蘿蔔素菜湯

6月27日(星期一) 晚餐洋蔥雞飯

上回打斧頭嘅雞脾是我的

6月28日(星期二) 晚餐榨菜雲耳肉絲飯、番茄雜菜湯