開心歡聚中秋節@2017

今年中秋節跟國慶假期相遇，中間相隔一天，大部份人選擇外遊，黃金週第一天國內多條主要幹道大塞車，星期日跟老大先嘆茶然後即興往B媽至愛嘅海鮮蒸鍋
老大話呢個嗰個又話去邊樹嗰樹，本來人少少話去靚太家BBQ，各有各忙遲遲未覆人數搞到book唔到BBQ爐，天文台又話中秋節當天會下雨，而二姐細孫只得5個月大需要baby room嘆媽媽奶 ，匆忙book咗個渡假營作為大家的基地，各家帶啲食物，原先呢個話唔嚟嗰個又話唔得閒有啲又話食埋飯嚟，結果人月倆團圓歡聚一番
小寶貝們只是擕著花燈進來，在營舍內都可以玩到癲呀，室外靚view都唔埋

講好咗我只負責豉油王炒麵，簡單又美味，搶先吃光

賞月必備的水果

B媽又拎啲生果嚟

還有月餅

咖喱爸預先send相嚟話整呢件斧頭扒嚟

大姐叫佢負責小朋友的飲品及買蕉，佢又唔聽話拎個發泡膠箱買咗2包冰還有啤酒、汽水、檸檬茶及菊花茶，還有佢嘅強項：極品一品鍋，佢將啲丸類、魚腐、炸豆腐、芝士腸及蘿蔔共治一爐，加送1盒外賣煎餃、1盒提子及柿子，結果…啤酒冇人飲(要揸車)，有一半飲品剩下，一品鍋冇人食，唔想浪費免強食埋半盒煎餃子，呀大姐，雖則妳女婿有車管接管送，但由下車地點到營舍需要步行一段斜坡及梯級，拎咁多嘢嚟又要搬番一半走，我都肉赤要一個詩文靚仔搬搬抬抬呀
二姐叫佢炒飯及豉油雞翼，佢驚唔夠食整多咗通粉、買咗生炒骨、蛋糕仔比啲孫食，結果通粉及蛋糕仔要拎返屋企做早餐
原先我話買條叉燒伴豉油王炒麵，假E話佢買啦，橫樹都係嚟我樹一齊打的，佢等我期間掃街買咗20元煎釀三寶，想買燒排骨又唔靚，多買半隻雞及半條紅腸
小馬媽今年要揍囡唔得閒買生果，話係咁二買燒腩仔啦，都一大盒
至於大佬話出去入油，買咗10碗糖水返嚟剩4碗，二姐用佢帶食物嚟嘅保溫壺拎走
搞笑嘅係我們啲second generation紛紛post上fb話：係邊樹玩玩什麼都不要緊，最緊要一家人聚在一起，一起就已經很高興，下次唔好整咁多嘢食喇，家長們聽到嗎

今年收到9盒月餅+4個迷你月餅，8款味道
我仍然至愛傳統蓮蓉月餅及自家製酥皮金沙奶黃月餅

陳皮月餅，陳皮味蓋過月餅嘅味道

 小姐至愛榴槤月餅

 飲茶打心口要買的月餅

 小姐至愛雪糕月餅

蛋黃酥 

 著名品牌月餅

小姐至愛抹茶月餅 

 今年熱賣流心奶黃月餅 

B媽請我食嘅金箔月餅

奇華奶黃月餅 

 美心雙黃白蓮蓉月餅

有2盒

奇華豆沙月餅

B媽請我食流心奶黃月餅

酥皮豆蓉月餅

今年酥皮金沙奶黃月餅產量少咗，見雪櫃有開邊綠豆，本想玩千層酥皮月餅，新手搞唔掂個千層皮，變咗酥皮月餅

綠豆蓉材料：開邊綠豆300克、鹽2茶匙、糖200克、熟芥花子油180-200克

做法：

1. 綠豆邊先洗2至3遍，然後清水浸過面，放雪櫃過夜，再清洗多2至3遍，去除豆腥味，加水過面下鹽2茶匙
2. 中大火煮滾，轉小火，見水面有白泡泡浮面，用湯殼片出白泡不要，加蓋煮約20分鐘，見豆邊開花，熄火加蓋焗約半小時王腍，瀝乾水，壓成蓉，過篩使其更幼滑，篩內豆皮不要
3. 先將芥花子油慢火煮至微起煙，成熟芥花子油，小心盛出一半，一半留鑊內，備用易潔鍋內加小心加入綠豆蓉，與鑊內熟芥花子油順一方向攪拌，直至豆蓉與油溶合
4. 分2至3次加入糖，順一方向攪拌與糖溶合，才分次加入剩餘的芥花子油，摌至成綠豆蓉，攤涼，用保鮮膜包好，放雪櫃冷藏
5. 取出綠豆蓉，先將綠豆蓉搓揉均勻，分成10份每份約重30克，備用
6. 包入鹹蛋黃半隻，捏埋口，搓成圓球形
   

水皮材料：中筋麵粉150克、黃糖18克、奶粉4克、鹽1克、無鹽牛油(無水奶油/豬油)36克、冰水60克
做法：同搓勻，略起筋光滑，用保鮮紙蓋好，醒麵30分鐘，分成10份

油酥皮材料：低筋麵粉210克、無鹽牛油(無水奶油/豬油)90克、吉士粉5克
同拌勻成糰，醒麵30分鐘，分成10份

組合：

1. 水皮包入油酥皮，收口向上排好
2. 從第一個開始，用麵棍擀成長方型(可用手拍酥皮法)，然後由上捲向下，收口向上依次用保鮮紙蓋好，靜置15分鐘
3. 每枝平均切開4份，兩塊一組分成兩組，左邊第一塊的外面叠在第二塊的上面，右邊兩塊同樣做法，然後將兩份叠埋一齊
4. 用手掌輕力按扁，中心點盡量在中間，用擀麵棍輕力略為開薄邊皮
5. 反轉酥皮，切口向外，包入餡料
6. 包好後，收口向下
7. 預熱焗爐200度(上下火)，約10分鐘
8. 入爐以180度(上下火)中層焗約20至25分鐘(不要烘得太耐，小心爆肚)
   

看似簡單，新手的我好難掌握，做唔到千層酥皮，有待改進

 大姐、二姐、假E每人2個

酥皮金沙奶黃月餅

今年為了品嚐熱賣嘅流心奶黃月餅而再次跌倒，家人又為了健康著想，自家出品酥皮金沙奶黃月餅出爐兩轉共60個，見好即收

一如既往，預早兩天分別出城扥啲鹹蛋及往烘焙店備料

9月21日先做第一回金沙奶黃餡料，翌日動工生產，今年改用品質較好的President牛油味道更昇華，特別的是今年天氣反常當下9月份仍然炎熱非常，我每次只是取兩個材料組合，印好的餅坯已開始溶化，避免入爐後產生象腳，必需要將餅坯放回雪櫃冷藏2小時或以上至硬身才可入爐，慢工出細貨，今年有進步出品較住年佳

9月22日第一回41個，現在少玩烘焙第一盤仍末能駕馭焗爐的脾氣

酥皮材料：(皮重1028克/每個皮重25克，鬆脆、冇咁乾、難操作要快手)
無鹽牛油250克、黃糖120克、蛋液60克、低筋麵粉360克、奶粉60克、吉士粉40克

金沙奶黃餡材料：(餡料重980克/每個餡重23克)
(A) 吉士粉120克、奶粉80克、黃糖160克
(B) 椰漿260克、花奶160克
(C) 雞蛋4隻(打散)
(D) 牛油60克(熱水座溶)

忘記蓋上錫紙蒸奶黃餡，蒸完後饀面龜裂

(E) 鹹蛋黃8個

9月23日包裝好送貨

10個大姐，10個靚太

 10個二姐，10個假E

9月28日第二回20個

酥皮材料：(皮重514克/每個皮重23克，鬆脆、冇咁乾、難操作要快手)
無鹽牛油125克、黃糖60克、蛋液30克、低筋麵粉120克、奶粉30克、吉士粉20克

金沙奶黃餡材料：餡料重490克/每個餡重21克)
(A) 吉士粉60克、奶粉40克、黃糖80克
(B) 椰漿130克、花奶80克
(C) 雞蛋2隻(打散)
(D) 牛油30克(熱水座溶)

(E) 鹹蛋黃4個

第三回仍然犯同一錯誤，同樣忘記蓋錫紙蒸奶黃餡

出爐放上架待涼時不小心碰跌咗2個，自家只吃這兩個，其餘送晒比親友，二姐跟假E異口同聲話她們試食個其他品牌的奶皇月餅都是我做的好吃，雖則今年我的產量少咗，唔該明年預留每人20個比佢哋喎，多謝賞面，自家還覺月餅外觀不足呀