椰汁千層紅棗糕

今回聖誕節，個糯米飯我用咗糯米2kg、長紹菜 1條、臘腸 8條、臘肉半條及魚片半條 (本想放鮮魷或蝦提升味道，因當中有人有對海鮮敏感，故以魚片代替，下回可分兩份，其中一份走(海鮮)，單是切片、切條都手軟，這回糯米飯，我個14吋黑金剛鑊全是滿滿的，我用上回B媽給我的燜燒鍋+2個外賣飯盒盛裝搬入屯門，佢地都要追單呀。做埋個椰汁千層紅棗糕，簡直是大製作

至於個椰汁千層紅棗糕，個個擧手話過年送禮必選，我做呢個紅棗糕等同罸企，企咗兩個鐘才可完成，心機之作

紅棗層材料：新疆紅棗300克(今回我以新疆紅棗及紅棗各150克，新疆紅棗比較健康，若是全用紅棗會略帶酸味)、木薯粉320克、粘米粉45克、糯米粉20克、水800克、香棗片糖250克、油10克

紅棗處理方法(1)：紅棗洗淨去核，先用浸過面清水浸半小時，以中小火煮半小時，熄火焗半小時，用攪拌器攪攔後，直接放入煲內以中小火燒滾後，加入香棗片糖煮溶，待涼備用

紅棗處理方法(2)：紅棗洗淨去核，先用浸過面清水浸半小時，以中小火煮半小時，熄火焗半小時，放入攪拌器攪碎後隔渣(可除除加水攪拌)，放入煲內以中小火燒滾後，加入香棗片糖煮溶，待涼備用溶待涼 (下回我選擇此方法，方便快捷及既可隔清渣滓及核)

木薯粉、粘米粉及糯米粉混合過篩，加入處理好的紅棗水(紅棗水連隔渣後紅棗茸=800克)拌勻至沒有粉粒，然後加入菜油拌勻

椰汁層材料：椰汁200克、木薯粉170克、粘米粉25克、糯米粉10克、椰糖100克、油5克

椰汁加入椰糖煮溶，待涼備用
木薯粉、粘米粉及糯米粉混合過篩，加入椰漿糖水內拌勻至沒有粉粒，然後加入菜油拌勻
蒸糕盤先掃油注入第一層紅棗糊漿蒸5分鐘成型後，注入第二層椰汁糊漿，蒸5分鐘，直至最後一層多蒸10分鐘即成(我固意紅棗層做厚一點)

現在試玩用紅棗處理方法(2)及馬蹄粉(比較健康)代替木薯粉，中層只放一層椰汁，完成後post成品

聖誕歡聚大餐

昨天在大姐家共聚聖誕節歡樂大餐

大姐沙津、碗仔翅

二姐桑寄生蓮子蛋茶、豉油雞翼及蒜蓉雞翼

佢都得拉架車仔攞埋個智能煲出嚟煲桑寄生蓮子蛋茶

B媽聖誕蛋糕及讚助壓軸抽獎禮物yeah

假E元朗燒鵝，與openrice讚賞不同，試過便算

靚媽選購了外賣焗羊鞞、煙肉焗青口、焗薯蓉田螺、迷你小牛角三重奏、大蝦蜜桃卷及煙三文魚白汁碎蛋卷

自制煎金蠔

仲有個靚名稱自制嘅Baby餐南瓜雞蓉伴翡翠(冇照片)

仲有飯後甜品七彩啫喱，多謝小可愛幫手整

我嘅糯米飯、千層椰汁紅棗糕

多謝靚媽出錢又出力搞呢個party，佢負責外賣美食及提供場地，還要完場後清潔呀!打搞哂

晚餐簡單買點菜、魚(大鷹倉)及蝦，煮個咖哩汁配剩咗嘅羊脾

總結：大家多選擇自家制食物，外賣只有迷你小牛角三重奏、大蝦蜜桃卷及煙三文魚白汁碎蛋卷較受歡迎，下次聚會多選擇迷你點心酥類

耆英

家陣隨著人口老化，長者又有車船優惠

講開啲老人家，上個星期我在銅鑼灣某商業大廈，這橦大廈只有2部電梯，大堂又窄又細，樓上又有食店，我眼見前面有位女士已經企咗喺度，我已經跟住佢後面排隊，其間1個又1個長者行入嚟，成團人企哂喺電梯口，實Q好清晰地指示排隊，啲長者又話我地排緊，喺度囉囉唆唆…咁實Q又再指示跟我後面排，佢地都唔聽，佢地好似細路仔咁…要實Q點人頭數人數直線向後排，搞完安排我連隨佢地10個人同1架電梯，救命…佢地只係1樓，入咗電梯仲好長氣地話應該排喺我前面，(查實我前面嗰位係同佢地一齊，佢一路都冇出過聲)，我入咗電梯已經企埋一邊，佢地都係咁推入嚟，若我知你地成團一起，我都會退出，算吧

冬至火鍋

昨天預早炆好冬菇海參，搞妥冬至祭祖事宜，晚上簡簡單單買點菜及蝦到老大家打邊爐，B媽搬哂佢啲腸仔、魚蛋、肉丸出嚟，大家圍爐食火鍋，感覺溫馨

每逢過節超市例必人頭湧湧，啲阿公阿婆好有氣力地自拆箱搶火龍果，雖則8.9元4個，都唔洗搞成咁吖，成間超市比你地搞亂哂，你地年紀大都要自律吓，速買2棵長紹菜及糯米返歸

今個星期小姐啲節目編排得密密麻麻，而我又多外食，晚餐連自家製麵包休市

生煎蘿蔔餅~其貌不揚

現在蘿蔔正合時宜，佷懷念兒時街頭小吃 "油糍 " ，即將已調味嘅蘿蔔絲粉漿，放入一個類似湯勺嘅容器內先大火炸至定型後，脫離容器繼續以中慢火炸至熟透，我也不懂是那地方小吃，只是知道每逢農曆初一至三，我家居屋苑有大堆流動小販找外快，其中有1檔有售，例必大排長龍，跟那檔主閒聊，她是印尼華僑說道是她家鄉地方小吃，但有的說是潮州小吃，不管是出自何方，好吃美味才是重要

我在家裏煮飯，並不喜歡油炸食品，一則為健康著想，其二是害怕處理剩下的餘油及事後清洗工作，通常都是每當臨近過年大掃除過後，家母例必叮囑要開油鑊取其生生猛猛，做些比較簡單應節食品，如炸些粉絲、腰果備菜吧

又想吃又怕開油鑊，今晚做咗個近期都谷友們比較熱傳的食譜 "生煎蘿蔔餅"，我做煎的食物比較不小心，雖則這個其貌不揚嘅生煎蘿蔔餅，但是真的是那 "油糍 "嘅味道呀

下次我要試 Jacky Yue嘅做法(用熱油鑊煎做蘿蔔糕的材料)

12月17日(星期三)晚餐：生煎蘿蔔餅、本菇蒸雞肉

材料：蘿蔔400克、蝦米50克、中筋麵粉80克、五香粉半茶匙、胡椒粉
蝦米洗淨，浸軟剪碎(保留蝦米水)
蘿蔔刨絲，灑鹽1茶匙拌勻，靜置10分鐘，等蘿蔔出水軟身後沖水，再搾乾水分，加入蝦米碎
將中筋麵粉、五香粉及胡椒粉混合，加100克水攬攪至沒有粉粒(唔好太稀)，然後加入蘿蔔絲內拌勻，便可以半煎炸方式煮熟

朱古力醬包

12月11日(星期四) 今晚我用練奶包的堆疊法整咗個朱古力醬包，還在發酵中…現在多做包，成品會集結一星期 post

昨晚個朱古力醬麵包又進步了，超鬆軟，我參考谷友網誌，先扣起酵母及水 20g，其餘材全放進麵包機內，攪打5-10分鐘，讓材料混合即可，麵糰狀態是成糰(或是黏黏的不太重要)，沒有乾粉就可以，關掉麵包機，按停機，關電制，總之是停止麵包機運作，然後等待1小時(過幾小時也可以，當然不要超過1天都不理它)，1小時後(麵糰充分吸收水分後)，將酵母及水 20g放回麵包機內，開動麵包機，就可按個人喜好按一般平常麵包機模式製造麵包
(留意水溫，冬天天氣冷，就要改用25-30度水溫開發麵)

12月15日(星期一1)出爐麵包：今晚玩咗造型3款腸仔包，我唔多好腸仔，做咗兩個果醬包比自己

這兩天比較倦都冇做麵包，就此看看今個星期的成品吧
昨晚個造型麵包，小姐very like，我還需努力加油

今個星期個天氣又轉涼，今晚氣溫下降及大風，真係吹到我有點頭赤赤，早點睡吧

12月17日(星期三) 今晚個洋蔥煙肉包，仍然依舊先讓麵糰吸收水分後，餘下程序全程由麵包機製作
昨晚實在太疲倦，洋蔥煙肉包全程交由麵包機製作完成後，沒有即時收包便睡著了，果不理想，麵包待著機內一整晚，以致麵包邊比較硬及乾

自由日

天氣凍凍地，小姐昨晚要求打邊爐，大佬話佢負責買餸
買咗龍躉腩、聖子、蟹、牛頸脊、墨丸、貢丸、芝士丸、芝士腸、忌廉磨菇丸，呢個忌廉磨菇丸試吓好啦、水魷、水餃、雲吞，仲識買埋蘿蔔、生菜，份量剛好，我摷埋雪櫃料有肥牛、煙肉、豬皮

仲有呀，大佬佢買咗餸返嚟仲自動去處理，包括清洗及煮湯底，雖然煮沙爹湯底是現成嘅，打開湯包加水就食得，其他洗洗切切都合格啦，大佬佢唔多做廚房嘢架

最開心嘅緊係我啦，星期六是我嘅自由日及廚房休市日，即唔煮飯囉，唔洗做又有得食呀

綠茶紅豆包

12月10日(星期三)出爐麵包：綠茶紅豆包
超多饀，我喺吉豬島買現成紅豆餡，每次出爐6個包，餡料用2次清光了

芝士包

12月9日(星期二) 個芝士包爆晒餡呀，好味
出爐麵包：芝士包

個包又係零晨出爐，等埋啲相，篇blog亦順延至零晨才可發佈
今晚個包仍在製作中，照片明天 post

上海年糕

十二月份各人忙著迎接…冬至、聖誕節…接著除夕、團年、農曆年… 多彩多姿嘅party及飯局

首先，靚媽要我自家出品嘅紅棗蛋糕及家傳糯米飯，出席佢嘅聖誕節聯歡會

小姐今晚公司開party唔返嚟食，還掂要預備明天佢嘅lunch box，想食上海年糕，今晚街市這檔定知道佢唯一有得賣還要15元1包貴個超市，平日見豆腐檔都有 "張力新" 嘅切片年糕，偏偏今晚想吃呢就沒有，這個牌子嘅年糕，要先放清雞湯煮軟入味後加點麻油(防黏著)，才可跟其餘材料混合

12月10日(星期三)晚餐：紹菜炒上海年糕

我較喜歡用上海一只鼎切片年糕，這個如實包袋推薦 "口感軟糯"

我是之前在大姐家居(屯門)附近的街市買過後愛上了，所以好似d婆仔咁保存包裝膠袋，以便大姐幫我隨時入貨，現在大姐比較少返老家，所以近期選用韓國年糕或張力新嘅切片年糕

100@blog

這篇是我的100篇文章，由當初第一篇摸不著方向，到現在還有一丁點兒的成績…心感萬幸

令我提起執筆興趣的是想記載我日常生活點滴，但白天忙著幹活，現大多數都是記錄我家日常晚餐的鎖碎事，人漸老總是喜歡懷念兒時的味道，我亦會努力改進，務求精益求精，臻善臻美

12月9日(星期三)晚餐：煎釀茄子、炒飯

肉鬆包

12月8日(星期一)出爐麵包：肉鬆包

椰汁南瓜提子包~感覺窩心

小姐今晚回來大讚話自家製麵包是No.1，午飯前仍覺得飽肚，不像街外那些空氣包，吃過後，不消一會要摷嘢食呀…感覺窩心

確實，現在做包已懂掌握一丁點技巧，但仍需努力，多加花款及變化，若時間配合的話，真的很想多加學習及進修吓，提昇技能

12月7日(星期日)零晨出爐嘅椰汁南瓜提子包

上次個朱古力吐司，是全程麵包機製作，柔韌適中，小姐收貨

今晚又玩椰汁南瓜提子吐司(製作中…又要零晨出爐，照片明天post)

美極煎雞膇

今晚預備的餸菜本應可嚮應Green Monday，食肉獸大佬返嚟食飯，改變策略，加蝦醬炒生菜及多碟美極煎雞膇配合番佢個胃口

12月8日(星期一)晚餐：蝦醬生菜、番茄煮蛋、美極煎雞膇

懶人湯包-猴頭菇响螺片湯

B媽比咗2包猴頭菇响螺片湯包我，內裏有猴頭菇、响螺片、黄芪、巴戟、蜜棗、杞子，近日天氣凍凍地，今晚用咗包嚟煲湯，全部放哂落快速煲(除杞子外)，開飯前15分鐘加入杞子reheat就可以

因這幾個星期都忙著為老五找個家，而沒時間處理湯料，只好用呢 d懶人湯包，查實我個人好少用呢d湯包

12月7日(星期日)晚餐：蒜片西蘭花、薯仔咖哩雞翼、豉汁蒸盲鰽、猴頭菇响螺片湯
用咗椰漿嚟調配田師傅咖哩醬，小姐very likes，佢呢幾日見我又做包又另外煮多個lunch box， 都搞到好夜，仲自動預留佢明天嘅lunch box…真高興(佢唔係好喜歡食隔夜餸架)

朱古力包

12月4日(星期四)出爐朱古力包照片(全程麵包機製作)

就是為了你

剛剛啟用新手機，於是將之前備份的資料存送過去，卻忘記了先將新機的照片先備份，新機嘅照片已被覆蓋了，找不出來…氣憤極了

查實我並不喜歡時常換機，一則是害怕照片/影片遺失(因無暇整理及備份)，其次是通訊及聯絡等資料，每每花頗長時間重新整理，所以換機都選擇同一品牌，方便資料更新，還有我部殘舊的 iphone4載著我很多珍貴的回憶

此機已到我手上個多月，就是為了你(iphone6+)…此刻一時大意，今次清空了我與外甥珍貴的畢業照片，心痛極了

腸仔包

12月3日(星期三)出燼麵包：腸仔包

快速晚餐

天氣凍鼻敏感又發作，吃過藥後，整天非常眼瞓，只好快速煮晚餐，早點睡覺

12月4日(星期四)晚餐：鮮冬菇釀魚肉煮紹菜、洋蔥豬扒、蒸鹹魚
咁多汁嘅洋蔥豬扒…當然係大佬返嚟食飯啦

紅棗糯米蛋糕~溫暖又飽肚

昨晚整咗個紅棗糯米蛋糕做早餐，天氣凍，我和小姐吃了一整個…既溫暖又飽肚

朱古力扭紋包

12月1日(星期一)出爐麵包：朱古力扭紋包

田雞飯

天氣凍凍地，今晚煮咗個田雞飯配埋個清炒椰菜花…巧溫暖呀

12月1日(星期一)晚餐：清炒椰菜花、田雞飯

整個星期，小姐好多節目，都冇要求 lunch box，街外嘢食得多，有點厭倦，佢話都是自家出品最好，咁賣口乖，即刻做個 special版嘅豬扒芝士白汁南瓜長通粉比佢
今晚所有出品全部都是小姐至愛

lunch box@2-Dec-2014