西洋菜湯~驚心動魄

旅遊回來後要報導吓自煮晚餐及包餅，然後整理吓日本南九州之旅相片後，旅遊篇隨後報導

4月1日(星期三) 咖哩薯仔雞翼、莞茜皮蛋鯇魚尾湯

今晚備好晒料，炆好雞翼，滾好個湯，見小姐未歸?whatsapp過佢，原來佢有約，哦.我弄錯了
呢兩個星期，大多數唔齊人食飯，小姐一陣話星期三，一陣又話星期五，啲日子搞到我頭暈暈，於是扣起個菜芯，大佬食咗6隻雞翼、吞咗3碗湯…勁

4月2日(星期四) 豬扒炒麵、泥鯭粥配炸両、油條

4月4日(星期六) 清炒西洋菜、祭祖燒肉,鴨、鹹蝦膏炒飯、西洋菜湯

清明祭祖回來處理好燒肉,鴨及清理所有物件後，速用個智能煲煲番個湯，上回煲菜乾湯已有問題，今躺當煲湯至大滾時，個煲自動啟動開咗排氣閥門，啲煙喺咁從氣口排出來，電子顯示屏冇晒嘢睇，按晒啲function key冇反應，惟有手動關電源
我當時好驚呀，啲湯料喺嗰煲入面滾到熱騰騰及排氣孔喺咁噴啲煙出嚟，又擔心個煲唔識off會抽乾晒入面嘅水，裡面已積存很大氣壓，我手動關電源時都害怕會否爆炸?手陣陣咁去關電制呀，關咗制後還要待個煲冷卻後才開蓋繼續煲埋佢，當然手動程式啦，開咗蓋由得佢滾，呢煲湯真的是驚心動魄

4月5日(星期日) 娃娃菜炆黑倉魚、五味醬碌春鴨
買咗隻鴨喺冷宮，這幾天假期又唔齊人食飯，電視節目大廚教煮五味醬碌春鴨，跟佢學習吓，好味呀

4月7日(星期二) 蒜蓉西蘭花、美極煎豬扒、蒸泥鯭乾、生菜魚肉湯

一陣五天復活及清明悠長假期後，明天外遊日本南九州，這幾天肚子裡已急速清理清明祭祖的糕點，還需處理冷宮餘下的食材