海綿芝士蛋糕

上回做芝士撻剩咗啲忌廉芝士，昨晚做咗個海綿芝士蛋糕，幼滑鬆軟，超級美味

 

材料：忌廉芝士100克、牛奶90克、牛油20克、低筋麵粉80克、雞蛋4隻、砂糖80克

將已軟化的忌廉芝士、牛奶，隔水座熱攪拌至順滑後，加入牛油拌至完全溶解後離火，然後逐隻蛋黃加入芝士糊內拌勻(每次都要拌勻後，才加下隻蛋黃)，再加已過篩的低筋麵，拌勻至沒有粉粒
蛋白用打蛋器高速略打至起泡，分2次加入砂糖用高速打約1-2分鐘，再轉用中速打至企身，最後轉用低速轉動消掉泡沬

先取1/3蛋白霜加進芝士糊中混合，然後倒進餘下的蛋白霜內，用膠刮輕輕快手拌勻，將芝士糊倒入已鋪牛油紙的模內，在桌上輕敲兩側震出大氣泡

放入已預熱180度焗爐內先焗20分鐘至表面上色，調至150度焗60分鐘，蛋糕出爐後立即在桌上輕敲兩下(有助減少回縮)，然後盡快把蛋糕脫模，再放回架中放涼
蛋糕面裂開是因為底火太熱，及冇注入水在焗盤中隔絕個底火，我只是底層焗盤加凍水焗20分鐘後移走後調低溫度，下回我會改進

乳鴿餐

假姨呢期玩團購，B媽係10月生日星，佢訂咗乳鴿餐，叫埋我去食，於是今早急趕整咗啲芝士撻慰勞佢

之前看過網評對此團購餐並不討好，例如侍應態度不好及食物質素下降等…我們並沒有太大期望，目的只是食乳鴿，看看今躺我們有什麼奇遇

當我們步進近入口嘅貴賓廳，因為當時都有幾枱客人，有兩個侍應執緊枱，見有個侍應剛在門口位置，假姨便跟他說已電話預約4位團購餐，佢竟然冇反應不秋不采，我們見有吉枱，於是便接著問:坐邊樹呀，佢呢都幾奇突咁話:你們鍾意坐邊就邊，咁.我話係唔係自己搵呀?佢呢話:係，呢邊有，嗰邊又有，週圍都有，仲喺度指嚟指去，我們冇理佢，自己搵枱坐，剛拉開張櫈，後面有個大叔走出嚟問幾位，好彩我們揀張細枱，冇阻住佢執枱，咁.剛才門口嗰位人兄又唔帶位，確係有趣

坐著開茶連上菜，都不用10分鐘，啲杯碟碗筷好傳統及要用熱水自行清洗2次

先嚟乳鴿、雞粥、燒骨、蝦、湯、菜及麵，一個接一個拎出嚟，都不用10分鐘又上完菜啦，感覺有啲餸菜係預先做好，還好，豆腐花係所有餸菜食完先拎出嚟

還有…呢樹冇傳菜員架，貴賓廳約20枱客，只有2個大叔服侍，你有你食，佢有佢清場

紅燒乳鴿2隻…我們專誠入嚟食，又係馳名及鎮店之寶…緊係好味啦
豉油皇蝦…預先做好，急凍蝦及冇去掉蝦腸
黑醋蜜燒骨…腩排炸得鬆脆，嗰黑醋醬汁好味Good
橄欖油郊外菜…郊外油菜，普普通通
燕窩燉土雞湯…一窩雞腳2隻，雞4件，瑤柱1粒，金華火腿1片嘅例湯
懷舊油渣炒麵…預先做好，豬油渣豉油王炒麵，啲炸到乾柴又硬嘅豬油渣，要揀番出嚟
沙田滑雞粥…粥底幾好，只有4件雞，其中一件係雞尾
山水豆腐花…個木桶好殘舊，裝糖水個碗還有很多活生生的螞蟻圍繞著，巧恐怖，要我用熱水剎身呀

總結全個套餐…食物不過不失

綜觀今天所見所聞，管理團隊必須改善服務態度，及定必注意環境衛生

從現今角度回望這歷史悠物，畢竟龍華已開業78年，歷史悠久，我已經有多年未到訪，從火車站步行前往，沿途已經轉變很多了，今天重遊，真的好像是大鄉理出城咁呀

芝士撻

近排日本人氣芝士撻大熱，潮流興食芝士撻，香港呢人們爭相排隊購買。我懶惰不願花時間排隊，倒不如嘗試自製芝士撻

今早起來，急趕地做了人氣芝士撻，因為要趕出門到沙田龍華食乳鴿，所以不小心弄破了幾個焗好的撻皮，而芝士撻入爐後，要快快調高溫度，做好後扣起2個比小姐，將餘下的立即pack好出門，冇影製成品相

中午，我跟B媽在火車站等待假姨時，每人吞咗個，咬下去撻皮酥脆，芝士味香濃順滑，此刻感覺是無上的享受，小姐還說食2個唔夠呀‥

食完乳鴿回家後，補回樣子醜八怪嘅相片
(因趕時間高溫焗製芝士撻，出爐後又立即裝盒，所以個撻面有點破相)

撻皮(2吋10個)：低筋麵粉90克、牛油50克、雞蛋30克、砂糖20克
芝士餡材料：忌廉芝士70克、Mozzarella Cheese 60克、淡忌廉60克、黃糖40克、淡奶(鮮奶)10克、粟粉10克、雞蛋30克

把已軟化的牛油切小件，放在已過篩的低筋麵粉內搓勻

加入砂糖拌勻

再加雞蛋搓成糰

放雪櫃至少1小時，取出分成10等份，鋪平在撻模內，以手指將它向外推滿整個撻模，用叉在撻皮內剌上小孔疏氣，以防撻皮在焐製時脹起，放入已預熱180度的焗爐內焗15分鐘，待涼，脫模備用

將忌廉芝士、Mozzarella Cheese、淡奶及黃糖隔水座熱攪拌混合至芝士粒溶解

 

將淡奶及粟粉混合後，加入芝士糊內，離火，然後加雞蛋快手輕輕拌勻至芝士糊光滑無粉粒

把芝士糊倒入己焗好的撻皮內，放入雪櫃冷藏2小時，取出，在撻面掃上蛋液

放入已預熱220度的焗爐內焗8分鐘

日本金賞cream cheese cake

小姐9月2日去台灣，晨早5點幾起床坐早機，玩咗4日3夜，零晨返歸扥咗箱江記華隆杏仁紙豬肉乾、紫菜豬肉鬆、洪端珍三文治12件、鴨舌(大佬指定要買)、鳳梨酥、太陽餅、炸魚條…又安排快遞咗個袋返嚟

我話佢夠膽買洪端珍三文治返嚟，佢話好方便，在車站附近買咗乘捷運到機場返香港，冇事喎，咁…我都食咗冇事，個三文治只係多咗層奶油，都唔明白點解咁多人喜愛

呢期…佢呢扮文青，10月8日又去日本，又玩咗5日4夜

今躺我叫佢買人氣芝士撻番嚟食吓，佢話只係去關西經大阪返港，冇時間，買咗呢個金賞嘅cream cheese cake試吓喎，包裝幾靚，味道一般啦

佢啲money去哂遊玩，今躺買嘢算忍手啦…大部份係佢嘅精神食糧

綠茶蛋糕

今回做個小姐至愛…綠茶蛋糕，整個蛋糕帶點綠茶味及充滿綠茶香

呢個綠茶蛋糕係小姐嘅飛彿，同樣佢又吞咗大半個做早餐

 

材料：雞蛋3隻、黃糖60克、牛油30克、低筋麵粉75克、綠茶粉10克、淡奶50克

 蛋黃加入黃糖20克，隔水(60度)座熱攪勻

再加已軟化牛油攪勻

 

 除去熱水盤

 再加已過篩的粉類及淡奶

 分次拌勻至沒有粉粒

蛋白用打蛋器高速略打至起泡，加入黃糖40克高速打約1-2分鐘，再轉用中速打至企身，最後轉用低速轉動消掉泡沬

先取1/3蛋白霜加進麵糊中混合

 然後倒進餘下的蛋白霜內

用膠刮輕輕快手拌勻

將麵糊倒入模內，在桌上輕敲兩側震出大氣泡，放入已預熱160度焗爐內先焗20分鐘，調至150度焗20分鐘，最後上火焗5分鐘，蛋糕出爐後立即在桌上輕敲兩下(有助減少回縮)，然後盡快把蛋糕倒扣出來，再放回架中放涼(我通常在模內鋪牛油紙，方便將蛋糕取出)

糯米蛋糕

雞蛋一排特價，買咗30隻，大佬近來愛吃佢嘅飯後甜品…涼粉+淡奶

雞蛋及淡奶塞滿雪櫃，天氣凍凍哋，想別吃點暖胃嘢，整番個我嘅至愛…糯米蛋糕，口感Q彈香糯，美味呀

整個蛋糕，小姐切咗大半個，只剩下呢件比我…強

材料：雞蛋3隻、黃糖70克、香蕉油半茶匙、糯米粉120克、泡打粉4克、淡奶30克、橄欖油30克

 雞蛋及黃糖隔水(60度)座熱用電動打蛋器攪拌至紋路不易散去

 加入香蕉油攪勻

 再加入已過篩的粉類，快手輕輕拌勻至沒有粉粒

最後加入淡奶橄欖油拌勻

將麵糊倒入模內，在桌上輕敲兩側震出大氣泡，放入已預熱180度焗爐內，先焗10分鐘，調至170度焗10分鐘，再調至160度10分鐘，最後調至150度上火焗5分鐘
出爐後，立即在桌上輕敲兩下蛋糕模(有助減少回縮)，盡快把蛋糕倒扣出來，再放回架中放涼(我通常在模內鋪牛油紙，放便取出蛋糕)

十月份家常便飯

摷咗啲花膠出嚟，浸發後1隻可分3餐，呢個月煲咗3次花膠，呢水花膠靚呀

10月2日(星期五) 排骨粥、炸魚片炒麵，大佬話炒麵煲粥呢，必定要追加油條

10月3日(星期六) 腐竹湯丸糖水

10月4日(星期日) XO醬西蘭花、清炒生菜、芋仔炆鴨、蘋果雪梨粟米紅蘿蔔煲瘦肉湯

10月5日(星期一) 沙茶醬炒芥蘭、梅菜肉餅飯

10月6日(星期二) 麵醬煮玉豆、蒜片白菜、美極煎豬扒

10月7日(星期三) 三色椒炒豬頸肉、白飯魚煎蛋、番茄薯仔梳囉魚湯
三色椒係大佬唯一喜愛嘅蔬菜

10月13日(星期二) 清炒福花、酸齋、蜜汁燒豬仔骨、芫茜魚片湯
是日農曆十五，買個酸齋食吓，呢嗰蜜汁燒豬仔骨3件要60元

10月14日(星期三) 炒菜芯、豉椒排骨炒三色椒、節瓜臘魚湯

10月15日(星期四) 沙茶醬炒芥蘭、蝦膠釀節瓜、栗子炆雞翼、番茄薯仔唆囉魚湯
栗子炆雞，各人大愛

10月19日(星期一)：炒菜芯、炒生菜、荷葉雲耳紅棗蒸雞、粉葛赤小豆豬骨湯
用荷葉嚟蒸雞，好味呀

10月21日(星期三)：節瓜娃娃菜煮豆卜、清炒菠菜、五味醬炆鴨、蒸海臘魚、合掌瓜粟米紅蘿蔔煲海底椰湯

10月23日(星期五)：炒菜芯、忌廉磨菇螺絲粉、花膠蓮子百合紅棗糖水

天氣乾燥，要煲番啲滋潤糖水

10月24日(星期六)：清補涼煲花膠雞腳湯，今晚係豐富嘅孤獨老人餐

10月26日(星期一)：麵醬煮茄子、豉椒排骨炒三色椒、西洋菜羅漢果湯
慳家好煮意，昨晚打完邊爐剩餘嘅西洋菜，要嚟煲湯prefect

10月27日(星期二)：清炒福花、蒜片白菜、煎雞扒、番茄薯仔鱲魚湯

10月28日(星期三)晚餐：花膠魚翅雞腳湯，今晚豐富一人前，煲番個靚湯嘆吓

10月29日(星期四)：煎豆卜釀煮白菜、黑椒牛扒、枸杞豬膶瘦肉湯

10月30日(星期五)：排骨粥、鮮蝦炒麵
慳家好煮意，餘廚雞扒用嚟配鮮蝦炒麵