流浮山蠔程之旅

1月21日(星期六)相約假E及B媽到流浮山辦年貨，我跟B媽是大鄉里，假E做導遊相約中午在中環等她下班，然後在永吉街坐969到天水圍，中環到天水圍交通暢順，過咗大欖隧道在天水圍聚星樓下車，下車處正是西鐵E閘口，走上西鐵站從E閘走往B閘到K65天盛苑巴士站，差不多由站頭走往站尾又上又落行咗8-10分鐘，到達K65巴士站又有長長的人龍排隊，等咗3-4分鐘車，擠在下層大多印傭及鄉親在元朗市中心各人大包小包及拖著購物車返回歸迫得水洩不通，巴士站站停落客20多分鐘車程透不過氣
在下車處有零星小販售賣自家特產，B媽已急不及待見人買佢又買幫襯伯伯40個大洋買咗斤黃薑，行到入大街見到啲貨品非常雀躍，我跟她在耳邊細聲道:睇定啲才下注，一路往大街向碼頭方向走

走到碼頭我在后海灣海邊觀望對岸深圳霧霾景色

B媽已揀選緊海螺乾，佢買2斤海螺乾都揀咗10多分鐘，於是我在附近望吓有咩買，見到個成條街都冇貨嘅撻沙魚乾，見個阿太喺樹揀緊，大叔話10元兩買咗8條佢好認真咁秤話20個大洋，又買咗條梅香鹹魚，在呢樹又見到個哥仔好開心拎住個膠盒喺啲蠔網度揀金蠔，心想應該唔似之前有啲檔主咁找啲外援扮顧客嚟騙人，於是細聲同佢傾吓計話:你都好叻喎，靚靚仔仔懂得揀金蠔過年煮大餐，佢好開心咁話:我每年都入嚟幫襯呢檔都唔會週圍搵其他架，而我又見佢揀咗好多差不多成網比佢買晒，見啲價錢同之前啲檔口差不多，哥仔話佢食慣大隻還說細隻啲都食得過架，於是叫埋B媽嚟呢樹

B媽望見便跟檔主講話:點解前面嗰啲金蠔脹卜卜架，檔主話:嗰啲係拖個水後使其脹大然後曬乾的，而我呢樹係天然生曬。於是我跟B媽喺呢樹揀呀揀，阿哥仔買完還教我們揀，揀到冇晒貨，檔主要派個仔返回家取貨；B媽不停在此檔買嘢，佢買咗蝦乾40兩、魚仔乾1斤、蠔豉20兩、金蠔2斤，連啲顧客都話啲蝦乾都被我們掃晒貨

忙於掃貨我們連午餐都未食，找檔餐廳執拾吓啲戰利品，原來遺留咗我斤金蠔未取，速走回取貨，返回餐廳沿途中我又血併咗8件馬仔、皮蛋、皮蛋酥、笑口棗、油角併牛耳；B媽話咁都比我買到嘢，財散人安樂，我們在流浮山買蠔、食蠔…真正是蠔程之旅呀

我們買咗好多嘢，而B媽又帶著Jonathan又冇拖購物車，害怕他在途中睡覺不願下車，於是全程坐mtr，回程要2小時才返歸呀

1月份家常便飯

1月份從月中開始膽粗粗自家翻身房間牆壁玩咗4日；年近歲晚大掃除及來來回回無數遍購買食材；自術後康復9個月的我，嗰兩個黃金星期的星級勞動，勁倦呀

1月1日(星期日) 元旦日悠悠閒瞓到中午才起床，煮個極度健康嘅麥片crunchy granola配蒸蒸日上的紅豆包，然後嘆杯milk呢個sunday brunch正呀

晚餐煮個雜丸菜芯叻沙麵

1月2日(星期一) 咖喱薯仔雞翼、煎牛扒、芥末八瓜魚鬚、雪梨雪耳湯
跟老大嘆完茶B媽比咗件厚牛扒及芥末墨魚鬚叫小姐攞回來，咁豐富備咗料嘅鮮蔬炆放回冷宮

1月3日(星期二) 黯然銷魂飯、雜丸炒烏冬、南瓜雜菜湯
近日要清理冷宮騰空位置準備農曆年入貨，呢件被遺忘嘅叉燒整番個黯然銷魂飯嘆吓

1月4日(星期三) 餃子菜芯瑤柱麵、鹹鮮馬友、冬菇雲耳雞飯、西洋菜魚湯

大佬拎咗2條鹹鮮馬友番嚟，檔主仿傚slow cook原理將魚放入保鮮袋再真空包裝，既可保鮮及清潔衛生that's good，我亦參照近期亞爺廚房做法將鹹鮮魚放上薑絲後灑少許黃糖蒸熟…真係冇鼎呀very good

1月5日(星期四) 福花瑤柱麵、榨菜雲耳肉絲飯、青紅蘿蔔湯

1月6日(星期五) 菜芯瑤柱麵

豆沙及蓮蓉包，又摷到包蓮蓉及豆沙餡出嚟，呢期要密密蒸飽呀

1月7日(星期六) 餃子菜芯麵、鮮蔬炒烏冬

1月8日(星期日) 福字米粉、洋蔥豬扒、娃娃菜煮鰵魚、木瓜牛鰍魚湯
用牛鰍魚代替大口魚煲個解毒湯

1月9日(星期一) 餃子菜芯瑤柱麵、煎雞扒、番茄蛋、響螺湯(又有2隻響螺存倉要清貨)

1月10日(星期二) 豬柳漢堡，幫襯吓今日M記10元2個豬柳漢堡，1個做午餐餘下1個明天早餐

福花肥牛燴蝴蝶粉，這個是小姐嘅lunch box

黯然銷魂飯

1月11日(星期三) 娃娃菜蝴蝶粉、銀魚乾蒸柳梅,雞髀、南瓜雜菜湯
呢幾天多走出城買餸，見到個阿太買呢款銀魚乾佢話好味，最低消費4兩呢樹65元味道果然不錯

1月12日(星期四) 粟米豆腐羹、肥牛烏冬

蛋撻，又有曲奇皮留在冷宮，玩咗幾個蛋撻

1月13日(星期五) 奶皇飽，清理埋啲奶皇餡

1月14日(星期六) 家鄉炒糯米飯(天氣凍凍地整咗大鍋糯米飯，packed好送比假E及B媽，今躺少咗叉燒及鮮蝦，老大都食咗兩碗呀)

1月15日(星期日) 沙茶醬炒芥蘭、香草煎焗雞、鹹鮮馬友蒸鮫魚、四神排骨豬肚湯
賴得開焗爐，將隻冰鮮雞用易潔鑊先煎香後蓋上鑊蓋焗吓佢果然不錯。食埋餘下嗰半邊鹹鮮馬友放在鮫魚上面蒸又係冇得鼎

1月16日(星期一) 豉汁排骨白飯魚乾飯、芫茜皮蛋鯇魚湯
隻雞髀原先預備比自己，有白飯魚乾便扣起隻雞髀

1月17日(星期二) 清炒西蘭花、鹹蛋臘腸肉餅飯、粟米紅蘿蔔栗子烏雞湯

1月18日(星期三) 榨菜木耳蒸牛柳絲、芫茜皮蛋鯇魚尾湯
近期啲虛火搞到牙肉好痛，要密密煲芫茜湯下火

1月20日(星期五) 菜芯冬菇麵

1月22日(星期一) 沙茶醬炒芥蘭、榨菜雲耳蒸牛柳絲、木瓜花生大魚尾湯

1月24日(星期三) 蘿蔔煮魚鬆、蘋果海底椰湯、雜錦炒飯(剩下的餘廚炒個飯比大佬)

1月26日(星期五) 清炒西蘭花、鹹酸菜炒燒肉、蜜味薑蔥炒雞、芫茜皮蛋鯇魚尾湯
例牌拜神燒肉雞套餐

1月31日(星期二) 齋菜炆黃花魚、炒飯 、生菜魚肉湯
用包過年齋菜煮昨天開年條黃花魚，大佬又買咗蜜汁燒排骨及生腸加餸

烏雞栗子腰果湯

近期虛虛地煲番個補腎益氣及健脾養胃湯
栗子補腎健脾，合桃溫肺虛寒咳、腸燥便秘適合食用，呢個湯有營養又合時，適合一家大小都啱飲，但要記得清晒感冒先可以飲

材料：烏雞1隻、粟米、紅蘿蔔各1條、栗子1磅、合桃半小碗、果皮

1. 烏雞汆水洗淨備用；粟米洗淨切件；紅蘿蔔去皮洗淨切件；栗子及合桃去衣洗淨備用；果皮浸軟備用
2. 果皮隨凍水下鍋，煲滾水後下已處理好的材料
3. 大火煲半小時，轉小火煲2小時，隨個人喜好下鹽調味

今躺沒有合桃用腰果取代，以上4人份材料，今回只有我跟小姐飲用，故份量減半

響螺湯

近日要清理冷宮騰空位置好讓農曆年入貨，摷到人2隻響螺，煲個超鮮甜嘅靚湯
現在市場大多售賣是養殖的約10兩重/隻，野生的非常稀少，檔主亦不會明碼實價售賣

材料：海螺、豬腱、淮山、蓮子、百合、茨實、龍眼肉、紅棗、果皮

1. 海螺及豬腱汆水清洗乾淨；海螺汆水後必須挖走潺及清除內臟(汆水後立即清洗比較容易清除污垢)
2. 淮山、蓮子、百合、茨實及果皮洗淨及浸泡1小時備用(如用湘蓮必須去衣確保湯色清徹)
3. 果皮及豬腱隨凍水下湯鍋，水滾後放入淮山、蓮子、茨實大火煲半小時
4. 加入已清洗乾淨的海螺，翻滾後轉小火煲90分鐘(可加入雞殼或雞腳)
5. 最後加入百合、龍眼肉及紅棗煲半小時，隨個人喜好下鹽調味(百合耐火煲會完全溶化；龍眼肉及紅棗不宜耐火煲，否則會使湯味變酸，食材適合關火前半小時加入)

我個人不喜歡下鹽調味，保持湯味鮮甜

木瓜牛鰍魚湯

用牛鰍魚代替大口魚煲個解毒湯，材料及功效都跟解毒湯一樣

材料：木瓜連皮去籽1個、青蔗1條、南北杏、薑、果皮、瘦肉、豬橫脷1條、南棗、無花果各4粒、牛鰍魚1條

木瓜連皮去籽洗淨；青蔗洗淨，斬件切開；瘦肉、豬橫脷汆水洗淨；餘下材料洗淨備用

果皮及瘦肉隨凍水煲滾後，放入餘下材料，大火煲半小時，轉慢火煲2小時

蒸蒸日上~豆沙包

2016送舊迎新，蒸幾個豆沙包，祝2017蒸蒸日上

液種材料：中筋麵粉90克、暖水70克、酵母2克

先將麵粉過篩，加入酵母拌勻，然後加入水份，用膠刮拌勻至沒有粉粒

蓋上保鮮紙室溫發酵1小時

主麵糰材料：中筋麵粉40克、砂糖15克、泡打粉1克、菜油6克、豆沙餡180克

將麵粉及泡打粉篩入已發酵好的液種內，加入砂糖及菜油

搓揉至光滑(不可起筋)蓋上保鮮紙靜置鬆弛10分鐘

把麵糰分割成8等份，搓圓，豆沙餡分成8等份

把小麵糰用麵棍壓成中間厚邊薄的圓形，然後包入豆沙餡，揑好收口向下，放在蒸包紙上，發酵40分鐘，由冷水開始，水滾後以中火蒸12分鐘，關火後側揭蓋降溫10分鐘後(避免回縮及倒汗水滴在包上)，即可取出