Ganmui Blog: 八月份晚餐

呢個8月份天氣反常，炎熱及少雨，悶熱得很，只是做咗一回甜餐包及兩回缽仔糕，簡單煮晚餐後，快速逃離廚房

8月2日(星期日) 炒菜芯、蝦醬肉碎煮豆腐、脆皮雞翼
今晚大佬唔返嚟食飯，懶得煮飯，7:00小姐話要食住家飯，立即摷冷宮將11隻雞翼解凍，用簡單醃肉三寶：豉油、糖、豆粉醃咗半個鍾，小姐摷咗啲消化餅出嚟整碎後與雞翼拌勻，放入焗爐20分鐘食得，我只是負責醃肉，後期工作佢攪，簡簡單單又一餐

8月3日(星期一) 麵醬煮豆角、黑椒金菇腩片卷
連鎖菜檔8元包豆角，超市只賣5.9抵買，近來密密食呀

8月4日(星期二) XO醬炒西蘭花、榨菜雲耳紅棗荷葉蒸雞、鹹魚白菜湯
慳家好煮意…隻雞扣起咗啲骨醃鹹佢用嚟星期五煲粥，餘下用荷葉嚟蒸是炎夏好味之選

8月5日(星期三) 麵醬煮茄子、翠玉瓜雲耳炒鴨胸
大佬唔返嚟食，平凡的簡單兩蔬加個鴨胸，就冇咁齋啦

8月6日(星期四) 蒜片白菜、洋蔥豬扒、節瓜鹹蛋肉片湯
慳家好煮意…10元兩斤白菜，星期二已用部份嚟滾湯，餘下今晚炒埋佢，這款白菜滾湯就可以，我們還是覺得鶴斗白菜比較好

8月7日(星期五) 腐乳通菜、鹹雞豬肚粥、炸蝦條炒麵
我並沒有打斧頭及虧待你們的胃架，將星期二扣起啲雞+豬肚嚟煲粥，便是豐富的雜糧餐

8月9日(星期日) 炒菜芯、榨菜雲耳蒸肉片、蘋果雪梨粟米紅蘿蔔煲瘦肉湯
天氣酷熱，大佬加料滷水雞翼

8月10日(星期一) 沙茶醬炒芥蘭、咖哩薯仔炆排骨
冇咩蔬菜選擇下，買咗芥蘭，炎夏芥蘭不及寒冬好吃

8月11日(星期二) 韭菜花炒鮮魷、冬瓜豬潤瘦肉湯
今天特地走出城買餸，10元3扎韭菜花、20元8隻鮮魷，唔買對唔住自己
大佬呢，唔會多食蔬菜，呢個冬瓜豬潤瘦肉湯是佢嘅飛彿，連湯帶渣吞咗兩碗，今晚簡單的1餸1湯，皆大歡喜

8月13日(星期四) 蒜炒白菜、醬油鴨、生菜魚肉湯
詢眾要求，買回鶴斗白菜，還有隻醬油鴨好美味

8月14日(星期五) 排骨鹹蛋粥、白菜炸魚片蝦條炒上海年糕及炒麵
上海年糕唔係大佬杯茶，特意炒個麵比佢

8月17日(星期一) 清炒翠玉瓜、蠔仔飯
小姐話好耐冇食蠔仔飯喎，今天又出城買咗斤，點知大佬又唔返嚟食，惟有扣起啲蠔仔，明天煎蛋

8月18日(星期二) 麵醬煮豆角、韭菜花炒魚片燒肉、蠔仔煎蛋、莞茜皮蛋魚片湯
慳家好煮意…韭菜花是上星期二剩下的，蠔仔一斤分2餐，18元一條鯇魚片整兩味，及扣起8條豆角明天煎蛋，豐富極了…爽呀

8月19日(星期三) 三色椒炒燒肉翠玉瓜、豆角煎蛋、生菜魚肉湯
現在小姐多食蔬菜，三色椒呢佢唔食青椒，話有草腥味喎，要加多個翠玉瓜炒埋一碟

8月24日(星期一) 炒菜芯、咖哩薯仔雞翼、冬瓜豬潤瘦肉湯
大佬加料咖哩三寶(魚蛋、魷魚、豬皮)，加埋啲雞翼煮翻熱佢，好味又大碟

8月27日(星期四) 榨菜粉絲木耳炒節瓜、榨菜雲耳蒸肉片、番茄薯仔肉片湯

8月28日(星期五) 炒菜芯、魚片粥、炸魚片炒麵
全新形象街市今天開業啦，感覺像日式超市般，分時段有promoter用揚聲器及搖鍾推廣，新張期各檔主亦不時增加人手加入納喊助推廣，嘈雜到頭昏腦脹，迫得水洩不通，速返歸
現在約只有1/3舊檔主，稍跟他們道賀及打氣，掃咗8元3斤菜芯、鯇魚及炸魚片各10元，20元6件泰式糕點