5月29日(星期日) [6/52] 老大現在每星期都請我飲茶，今天茶後我沿太古城步行至筲箕灣，check健康數據記錄係行咗6436步/3.37公里，返家已5點，急趕整理晚飯
今天我完全忘記自家還在休養中，每次跟他們吃飯或飲茶，自家睇多個食(因為要戒口)，今天跟隨大隊食咗炸両、魷魚鬚、煎腸粉、豬扒炒河，老大話係干炒牛河，佢見我唔食牛肉咪改豬肉囉，碟炒河上嚟係椒鹽豬扒。而且走路又多咗，晚上雙腿內側腫咗及有點酸痛，腰部又倦…驚驚，還考慮應否跑到急症診室?趕快梳洗睡覺休息，剛躺下來…感覺熱氣，多食咗煎炸嘢、睡不著，飲咗濃茶，一則老大喜愛濃茶，以往我都自行用開水溝淡些，今天溝少咗，輾轉反側至04:00才可睡著
5月30日(星期一) [7/52] 昨夜睡眠不太安穩，早上大姐話飲茶，11:00已到黃埔花園等她，茶後一併跟小可愛回校上課。接著跟大姐行吓行吓，從九龍城行至土瓜灣乘車回家，返家已3點多，心驚驚…今天又行咗8085步/3.25公里
6月2日(星期四) [7/52] 現在每天多些落街走動，今天嘗試步行出城，原想買完嘢就乘車返歸，自家感覺還可以，便慢步回家，good呀曬住陽光咁行吓8058步/4.79公里
6月4日(星期六) [7/52] 相約B媽及二姐先行到荃灣早餐後祭祖，B媽還說呢度啲奶茶好飲呀，分半比我，實質以往我都會喝奶茶，自患病後我也乖乖戒掉了。今天又行咗7708步/3.84公里
6月7日(星期二) [8/52] 術後第二次覆診，預約時間11:45，編排嘅醫生11:20才回崗位，待著1小時後才見林醫生，步進門還未坐下，醫生滔滔不絕地講…你好，我是林醫生，上次驗血及小便冇問題，癌指數唔高，今天要照超聲波，看看肚內還有沒有積水，照完超聲波，醫生說;冇問題，冇積水啦，我還未整理好衣服步回坐位，她還隔著布簾說:下次7星期後回來常規檢查，通常在術後的第一年，需要3個月定期追蹤，我整理好衣服返回坐位，醫生說:得啦，唔洗擔心。前後不足15分鐘，因咩咁趕，此時已13:00，同事們要落班午飯也
上回鄧醫生多好，雖則也是同樣時間，但他仍耐心聆聽我的病況及檢查，並沒有像今回般急促
我自術後，自家每週總結病情進展良好，今回覆診碰著那個傻大姐般的醫生會診，總算過關及輕鬆吓。慶幸癌病仍屬初期，也就是疾病仍然局限在切除器官裡，其他相關與淋巴系統都沒有受到影響，術後不需要再做任何的輔助治療，那可惡的癌細胞可算擊退了
接受癌症治療固然要保持樂觀，但必須是審慎樂觀，也就是說在接受癌症治療前，一定要了解到任何癌症都有復發的可能。即使是最初期的治療成功機會可以到達95%以上，但是仍然還是有5%的復發機會，所以要配合醫生的建議定期追蹤檢查，絕不可以認為接受的相當治療完整而忽略定期追蹤的重要
沒有留言:
發佈留言