夏枯草羅漢果涼茶

小姐近期日以繼夜地玩pokemon，薯片零食不停口，煲個夏枯草羅漢果涼茶比佢清吓熱氣

夏枯草能清熱瀉火、明目、散結消腫，羅漢果清熱潤肺，金銀花清解血毒，菊花解熱、解毒，脾胃氣虛者慎服

材料：夏枯草100克、羅漢果1個、金銀花、菊花各20克、黃豆50克

8月份家常便飯

呢個月好多飯局，今個月外出食咗3次片皮鴨，我亦破戒，每次只吃一小口。呢個月大佬差不多每個星期拎啲咖喱三寶及滷水雞翼返嚟，為咗健康著想，我每餐只配給1隻雞翼。還好湯水煲多咗，精神亦都好咗

8月1日(星期一) 滷雞翼飯、番茄雜菜湯
風姐妮妲到來的晚餐，小姐例牌棄飯煮個雜菜湯，用迷你電飯煲煮十殼米健康餐

8月2日(星期二) 榨菜肉絲雞翼飯(大佬嘅)、雞脾菜芯飯(我嘅健康餐)

8月3日(星期三) 煎蛋菜芯飯、午餐肉煎蛋炒意粉

 是日開始茹素兩星期，簡單煎隻蛋加啲菜做我嘅晚餐

8月4日(星期四) 雞蛋芥蘭燴意粉、磨菇煙肉Risotto
小姐現在多菜少肉，每早灼半斤蔬菜佔咗lunch box三分之二位置，剩咗昨晚啲意粉，今晚我烚隻蛋加啲芥蘭做晚餐

小姐lunch box

8月7日(星期日) 節瓜鹹蛋肉片湯，煮碗十穀飯比自己做湯飯

8月9日(星期二) 梅菜肉餅飯、合掌瓜粟米紅蘿蔔湯

8月10日(星期三) 芫茜皮蛋鯇魚尾湯
小姐話成個口生哂痱滋喎，要求煲芫茜湯下火。實則呢啲係虛火，佢現在極度減肥缺少營養引起的

8月13日(星期六) 梅菜肉餅飯、粉葛赤小豆扁豆排骨湯(煲個粉葛湯比小姐去埋骨火)

8月14日(星期日) 冬菇臘腸雞飯

8月15日(星期一) 鳳瓜排骨飯、芫茜皮蛋鯇魚湯(小姐再encore芫茜湯，今晚勁多芫茜)

8月17日(星期三) 蝦乾雞翼飯、番茄雜菜湯

8月18日(星期四) 洋蔥豬扒飯、淮山粟米紅蘿蔔煲豬橫脷湯
一鍋兩食，煎香豬扒及爆炒洋蔥時，同時加啲翠玉瓜比自己

8月22日(星期一) 番茄湯翠玉瓜雞翼通粉、黑椒雞翼燴意粉、番茄雜菜湯

小姐嘅lunch box

8月23日(星期二) 沙茶金菇火鍋肉片飯、淮山蓮子百合海螺湯
爆香沙茶醬做個醬汁，放金菇及火鍋肉片燴吓放回飯面，今晚啲餸菜啱哂大佬嘅胃口

8月24日(星期四) 榨菜雲耳肉絲飯、雪蓮果海底椰湯(雪蓮果湯好清甜)

8月29日(星期一) 榨菜雲耳肉絲飯、節瓜腐竹魚紅衫湯

8月30日(星期二) 豉汁排骨鳳瓜飯、番茄雜菜湯

8月31日(星期三) 蜆肉粟米芝士燴意粉、勝瓜鱲魚湯

8月1-10日~1人前精選
1/8 咖哩三寶蕎麥麵、2/8 滷水雞翼西蘭花米線、3/8 菜芯烏冬
4/8 涼瓜奶油麵、5/8 涼瓜蕃茄麵午餐、芥蘭芝士燴意粉晚餐
6/8 芥蘭番茄麵、9/8 涼瓜奶油麵、10/8 芥蘭瑤柱麵

8月11-25日~1人前精選
11/8芥蘭奶油麵 18/8翠玉瓜番茄芝士燴意粉 19/8菜芯麵午餐、魚蛋菠菜螺絲粉晚餐
20/8 餃子菠菜鮑魚麵、21/8 菠菜番茄麵  
22/8 雞翼菠菜麵、24/8 雞翼翠玉瓜番茄麵、25/8 雞翼西蘭花通粉

8月26-31日~1人前精選
26/8 餃子菜芯通心粉午餐、雞翼菜芯番茄麵晚餐
27/8 雞翼涼爪番茄麵、29/8 雞翼涼爪番茄麵  
30/8 雞翼涼爪番茄麵、31/8 番茄薯仔湯雞翼烏冬

雪蓮果海底椰湯

立秋後煲番個雪蓮果湯滋潤吓，雪蓮果味道清甜，有點像雪梨用來煲湯最適合

雪蓮果含有較高的鈣、鎂、鋅、硒等微量元素，可以調理血液、降低血糖、血脂和膽固醇， 預防和治療高血壓和糖尿病。雪蓮果的果寡糖含量是所有植物中最高的，可幫助消化、調理腸胃，有潤肺通便，減少結石和致癌毒素，能清肝解毒，有效防治暗瘡，能抗氧化，是天然保健果品，但脾胃虛寒及泄瀉者不宜

材料：雪蓮果1斤、海底椰200克、粟米、紅蘿蔔各1條、淮山30克、蜜棗2粒、西施骨300克、果皮

先將果皮浸軟。淮山洗淨後浸泡1小時。西施骨汆水洗淨備用。粟米及紅蘿蔔去皮切件。果皮及西施骨隨凍水放入煲內，水滾後放入已去皮切滾刀塊的雪蓮果及餘下的材料，大火煲半小時，轉小火煲2小時

蟹煲蛋糕生日飯局

昨天老大生日，他愛吃海鮮，靚太訂咗個蟹煲蛋糕比佢，話比個suprise佢喎

老大昨晚相約飯局，飯後大家忙著跟個蟹煲蛋糕拍照，忘記咗個請食生日嘅主角，呢個蟹煲蛋糕全場最受歡迎呀，多謝老大請食飯

蛋糕的蟹蓋及蟹爪以白朱古力製成，蟹蓋還藏著以果汁味嘅爆爆珠作為蟹籽，蛋糕面層為mousse椰漿拌有少許米飯，內層為香芋味道嘅mousse蛋糕，蟹爪朱古力香滑美味，蛋糕以砂鍋盛裝增添特式，cake shop將整個包裝放入蛋糕紙盒內，有點不勝負荷，建議自備環保袋

靚太花心思，以老大寵愛的小可愛名義訂蛋糕，佢當然窩心啦

昨晚個套餐啱哂老大胃口，有龍蝦伊麵、油浸筍壳魚，還另加片皮鴨，今個月食咗3次片皮鴨啦，我已破戒每次只吃一口

題外話，老大居住嘅大型屋苑，自呢間集團結束後，管理公司大革新，將原有嘅food court遷往在此，兩個位置現在密鑼緊鼓地裝修，缺少咗間酒樓，差不多同一時間少咗個food court，食肆少咗，上回我們早上10:30用apps預先取籌號飲茶，差不多12點多到齊等入座，我們一群人還要等到2點才可入座，當然各人等到著哂火，等咗咁耐，緊係肚餓啦，客人多擺枱又多，差不多要椅背貼椅背坐，老大坐下未侍應擺好餐碟，已order肉片湯河比佢個寶貝孫吃，啲小老闆吃飽，到我們嘆第一輪快速揀選嘅點心，有潮州粉果及牛肉，當然要配辣椒油及喼汁啦，傳菜姐姐冇放底，當時已即叫佢補回，亞姐回應:哦.好吖，等咗5分鐘都冇嚟，咪追侍應囉，佢哋個個黑色制服配合埋做到黑起塊面嘅表情，你叫佢睇唔到又聽唔到，應你嘅話你冇叫我攞喎?食晒第一輪點心啲醬汁都未嚟，繼續order第二輪嘢食，順道叫侍應清吓枱啦，又要等，最後嚟咗個鴨腳紥，用淮山卷著代替腐皮，我吃一口感覺淮山有點酸，放下不吃，B媽同樣話淮山是酸嘅，冇食淮山，到結帳時，B媽好意跟侍應講:啲淮山是酸嘅話比經理聽叫廚房留意吓，他媽的呢個小啦叭亞姐吖，佢問我哋有冇食個呢樹嘅淮山喎?B媽理直氣壯回應:冇吖，今次第一次嚟呢度飲茶，我在其他地方食嗰啲都冇酸味嘅，應該是淮山變壞咗。於是我跟B媽在耳邊輕聲話:佢以為我們想將此點心退回費用，呢個亞姐又嘆一口氣，轉個身跟後面正在執枱個亞哥講:喂.佢哋話啲淮山酸喎，呢個亞哥停下手行近我們枱邊話:我哋呢度係用新鮮淮山，蒸個後做成嘅味道喎，咁講都得?講真，我們眼見你們今天工作忙碌，各人都做到團團轉，當發現淮山味道不對勁時，都不再即時反映，免再打擾，當結帳時，剛巧還未清枱，是出於好意向你反映，並不是為難你們，相反地，當你們外出嘆茶，亦不希望有此情況發生

另上回靚太請食飯，同樣是該集團嘅酒樓，呢間集團嘅員工，好簡單嘅食完嘢清枱食甜品，同樣地是叫先做，叫到有人嚟，她們先收起一些，跟另外一個講:交比你啦，跟住唔知去咗邊囉，等咗10幾分鐘再叫先做呀…劣

淮山蓮子百合煲海螺湯

前天清理吓冷宮，發現有包急凍海螺，配咗淮山蓮子百合煲個滋補湯水飲吓，啲咁細隻的海螺好多工序清洗，雖則清洗海螺功夫多多，極度減肥的小姐飲咗3碗，還讚此湯鮮甜美味，又係大佬飛佛的湯水，叫我煲多啲喎

材料：淮山、百合、蓮子各30克、豬腱300克、海螺300克、果皮

先將果皮浸軟。淮山、百合、蓮子清洗後浸水1小時。海螺汆水後，除去硬片，開肚除去肚內臟及用刀括除污積後清洗乾淨備用。豬腱汆水。果皮及豬腱隨凍水放入煲內，水滾後將餘下的材料放入煲內，大火煲半小時，轉小火煲2小時

老大生日快樂

今個月多生日飯局，星期六出外飯聚，跟老大慶生

祝老大 生日快樂

老大善待我們寬容，自己生日卻愛低調，今年我嚷著叫他出來晚飯，適逢週末，在冇預備備情況下，簡簡單單外出吃飯，飯後返回家裡吃蛋糕，各人嘻嘻哈哈歡度過

呢間酒樓招呼唔錯，飯後還有甜品奉送

首爾5天遊–Day 5

7月8日(星期五) ~  Day 5 天晴
護肝寶專門店 ~ 麻浦農水產市場 ~ 韓國特色手信店 ~ 首爾仁川機場 ~ 香港

08:38 早餐，last day在此污點餐廳，估佢唔到，今天個蜜糖黑豆又唔錯

離開污點酒店，往護肝寶專門店沿途街景

鄰近污點酒店的大街道，附近有個東首爾綜合巴士客運站，當天沿路都有軍人行走

 廣津區往麻浦區沿鐵路的特色列車

10:30 護肝寶專門店
地址：首爾市 麻浦區 鈴川路 83番地

韓國觀光局指定遊覽地方，停車場內已泊滿10多輛旅遊巴，烈日當空下場外架起帳篷，強國人魚貫排隊入場，導遊跟專門店特派講解員溝通好進場時間，我們在車上待著5分鐘才下車。入內門面裝璜雅致，整體光潔明亮
例行公事特派講解員噴口水時間，護肝寶是韓國珍貴稀少名產枳椇子果實，經過長達二十年的研究與研發，純天然無添加任何中西藥材，枳椇子果實和高麗人蔘主根部分之精華濃縮製造而成。枳椇子果實生長在韓國50-800公尺之無污染的山林，被本草網目李時珍稱為[金果樹]
然後hard sale及試食產品，又話香港有專門店在尖沙咀，直接喺呢樹買平好多優惠又多。地方大及靚又點吖，咩咩皇牌金/白金系又如何，今回此家專門店食白果，sales姐姐由笑臉迎人變黑面大臣，搞搞陣又冇幫襯，唔使半個鐘鬆人，成團人咪要在場外曝曬等車走人囉

12:00 韓國特色手信店
強國人塞滿整店，大包小包地買，我只買包KRW4500嘅牛牛綿花糖及KRW5000嘅牛油蜜味mix nuts

往麻浦農水產市場沿途街景

呢個大叔，隨便企在窗台修理窗框

12:45 麻浦農水產市場
地址：首爾特別市 麻浦區 城山洞 533-1

自費節目，鄰近世界杯體育場，下車快閃咗2張相

麻浦農水產市場水產檔不多，其他是乾貨及水果區，規劃乾淨舒服，設有特色韓國土產，海苔、餅乾、泡麵、魷魚絲、糖果。逛market當然係愛好煮食朋友嘅飛佛啦，奈何只有45分鐘掃貨時間，真係要極速掃貨

有檔賣韓國泡菜嘅檔主，擁著我們免費試食，她們細心用膠盒盛載外帶的醃菜，還外加多重保鮮紙，另個別放在錫紙袋內，以免在運送途中壓毀包裝弄髒行李箱，老闆娘還請小可愛飲益力多呀，咁懂得做生意，緊係要幫襯啦，靚太買咗泡菜、甜辣味小蟹，呢檔好多導遊推介
大姐喜歡韓式宮廷甜點，黏黏糯糯，KRW20000買咗pkgs比佢做飯後甜品

入口處有間多農超市，此處多賣批發式包裝物品，超市旁還有熟食檔，看見隔離團友在街市買海鮮來料加工在此處2樓開餐。很可惜行程編排最後一天在此購物，若時間充足及行李箱有空位嘅話，我定必在此逗留一整天
用KRW500開鎖鏈拎架購物車，KRW4900買咗1.5kg年糕2包，KRW5300酸辣蕎麥米線，還有很食材都冇時間睇呀

跟靚太分道揚鑣，佢走回乾貨區，KRW10000買咗包大蝦米嚟煮粉麵嘅湯底
我最後用KRW20000/14個扥咗箱及KRW10000/6個嘅水蜜桃

KRW10000/6個嘅黃金瓜

14:12 豬骨煲
自費每人KRW18000嘅late lunch，樓高兩層，導遊話剛才全店滿座，冇枱要晏少少食喎，20多個座位嘅樓層，又係包場。驚險呀，其中有枱個gas爐著火，團友哎著火及已即時離枱，全部人望住張枱冇反應，有個大叔行過去熄咗過爐，然後拎起個煲，用塊布攞走個gas爐放回廚房門口，又冇檢查又冇清潔亦冇標示此爐有問題，在同一位置換個爐比嗰枱團友，緊係唔要啦，又著火點算，大叔嘰嘰嚕嚕好不願意換個張枱。嘩…剛才困獸鬥在細小樓層內，若爆炸真係唔知點算，我當時立即拉著小可愛走埋一邊攬護住佢呀，即時教導佢逃生及危機處理方法，驚驚

15:08 往首爾機場。膽戰心驚食飽午餐後乘車往機場

16:00 到達首爾機場
抵達機場後，各團友翻箱倒篋重新裝配行李，然後往航空公司辦票櫃台辦理乘機手續及扥運行李，若有退稅品，需在行李上貼上Bag Tag，退稅品需要轉到旅客通道向海關申報，利用國內稅自動退稅機(KIOSK)辦理退稅，在海關確認購買物品，並接受檢查後，到海關申報處旁大型行李扥運台放好大型行李

禮貌地跟隨團韓國特派註冊導遊及攝影師道別後，我們擕著2箱共26個水果、紫菜零食過安檢及邊防檢查，進入出境大廳，先到免稅區域自動退稅登機口取回退稅款項，興興鬆鬆遊逛航站樓3樓樓層，此樓層免稅店多得是

 小可愛停留在兒童遊樂室玩耍

傳統文化體驗空間
值得一讚，工作人員穿韓服招待，排隊輪候座位，二選一挑選紙扇圖案，便可扇上塗上顏料，既可推廣韓國文化又可涂冶性情

小可愛手工並不精美

塗完顏料，已經19:13，距離登機時間還有1小時，靚太擔心航班會否delate，買咗啲cake及milk給我，靚爸跟小可愛先行食晚餐，小可愛個麵辣喎，買枝水比佢，即時灌咗半枝

21:38 航機上晚餐。我嘅雞肉飯、配沙律及tilamitsi及大姐嘅魚飯

小可愛嘅兒童餐好多嘢食，雞肉螺絲粉及餐包，還有呢盒snacks，嗰盒蓋可玩迷宮及填字遊戲

23:28 到達香港後直接打的到大姐家，明天早上跟小可愛到天水圍體育館上興趣班