靚太生日快樂

8月11日靚太相約到尖沙咀映月樓晚飯，佢話想吃片皮鴨喎，實則就近佢生日，食吓飯聯誼吓

祝 靚太青春常駐，佢話近期股市撈到錢請我跟B媽食飯，多謝哂，賺多啲啦

當晚6點多入座，文化中心對出多美景，還可在詠彩幻香江伴隨著吃飯後甜品

當晚個片皮鴨餐兩食，配給小份量比小可愛，佢不停捲呀捲，不亦樂乎，我只吃一小件。剩下嘅骨肉豉汁爆炒涼瓜，涼瓜份量略少。配大蝦沙律，大大碟足夠我們大小6人吃

還多叫老點加老菜

子薑仁稔蒸魚雲，仁稔份量略少及調味略甜
回味話梅炆豬手，高速炆煮效果致豬手未能吸收話梅味道，調味又係略甜

西關大少桂花扎，呢個較少機會食得到，以瘦肉及冰肉捲著膶腸及鹹蛋黃，塗上蜜汁燒製，切片後形如桂花，感覺及味道唔錯。上湯蟹肉片兒麵，用蛋及麵粉做成嘅麵略多咗水份及無味，空拋拋的。心思思豬油撈飯，不過不失

飯後甜品：梳乎厘燉蛋、三色水晶糕

靚太話好懷念兒時老菜嘅味道，深信我亦能做出幾道精髓菜式，還叫我show off比佢睇喎，好吖，no problem，現在籌備中秋月餅，鑽研緊鳳凰菊花拆魚羹、香蕉雞蛋糕、棗蓉馬拉糕，遲吓做給你慢慢品嚐