入廚樂

在圖書館找出來的一本好書介紹~入廚樂/黃吳珏婷著

我欣賞作者視烹調為藝術及對家鄉傳統古法糕點表達細緻，無論佳餚美饌、糕點、小吃、粉飯湯酒，都能無私的分享，從書本中更能認識了很多精彩古典茶具，值得回味

馳名店舖

每每出荃灣拜祭祖先，為咗避開人潮，，我們通常選擇早出發，上山道路經實施交通管制及有專車點到點接載後，相比以前好得多

嘆咗杯咖啡+前晚剩下嘅法包作早餐便出門了，個隔夜法包依然鬆軟

大多數過時節的物品，都是我負責，現已簡化很多了，但都總是忙得不可開交，而我例必前一晚睡不安寧，昨天如常早起準備一切，經過一天辛勞及至兩點多才怱怱吃過午飯，便趕著回家，回到家裡又忙著清理物品，已經有點頭昏腦脹，趕快做晚餐及吃下兩三口，便要立即躺下來休息，躺著過多小時還沒有好轉，擔心要否趕往看醫生？嗰胃飽飽脹脹，徹夜碾轉反側，幸好休息過後，今早好一點

9月27日(星期六)晚餐：雞油生菜、翻熱拜神豬肉及雞(用洋蔥、糖、豉油快炒)、豉汁蒸倉魚 (半條存貨)

昨天09:30已到荃灣，太興要10:30才有燒肉，轉行前街角馳名店舖，呢兩條燒腩骨要220元！貴過太興呀

羅漢果菜乾湯

用咗斤半大白菜嚟煲湯，湯渣都有好多

材料：白菜、菜乾、紅蘿蔔、羅漢果、燒豬骨

9月28日(星期日) 節瓜炆黑倉魚(冇拍照)、梅菜蒸肉餅、羅漢果菜乾湯

主題日晚餐-西式晚餐

是晚煮咗自家老套西式晚餐：羅宋湯配法包+白汁蟹柳扁意粉，法包加添亞麻籽，用簡單直接法，按麵包機份量指示完成，只是調較出爐與晚餐時間配合，羅宋湯配法包每人兩碗，小姐要添多碗…飽飽

9月26日(星期五) 自家老套西式晚餐：白汁蟹柳扁意粉、羅宋湯配法包

綠茶芝士蛋糕

小姐近來總是飯後定必吃甜點滿足吓，那些月餅被遺棄了

前天佢做咗馬卡龍(勁甜)，昨天佢又做咗個綠茶芝士蛋糕
今次失敗原因是忌廉芝士未完全待軟便混合，雖然已用篩過濾，但仍有粒狀，有待改進

翠玉瓜炒粒粒

我家班怪人，最喜愛炒粒粒，不管配什麼材料，定必全部吃光，我大多數用菜脯及豆乾，今晚再配翠玉瓜、鮮冬菇、鮮粟米粒，只是用刀切的工序多一些，單是這個菜，下飯已一流，都不用著意其他菜式了

9月25日(星期四)晚餐：翠玉瓜炒粒粒、日式麵醬煮雞翼尖

茹素晚餐

前幾天路經荃灣近街市那邊，有好幾個公公婆婆拿自家種植的蔬菜出來搵外快，買咗30元珍珠豆+15元節瓜，是日齋期，今晚煮咗個麵醬煮珍珠豆+煎腐皮卷，作茹素晚餐

我比較喜歡明德醬園(紅磡近觀音廟)的麵醬，每次以麵豉+磨豉(1:1份量)用來調味，小姐都大讚調味得好，又勁讚珍珠豆好清甜呀

9月24日(星期三)晚餐：麵醬煮珍珠豆、煎腐皮卷

Green Monday-(非洲)蓮藕餅

通常星期日飯菜豐富些，昨晚有魚有雞，餸菜清碟，飯就剩下來，唯有今晚炒飯，呢班大帝每個星期日都剩下d飯，隨後嘅星期一煮個素菜，響應一吓Green Monday

實則我個人初一、十五都會茹素，無謂要小姐咁dry，外賣多個蓮藕餅，平日呢間素食館個蓮藕餅唔錯架，今天個廚房做咗個非洲版比我囉

9月22日(星期一)晚餐：蒜片生菜、蓮藕餅(外賣)、薑粒橄菜炒飯
為何有粒橄核在炒飯面呢？今次呢個品牌隨包裝內附送(贈品嚟架？多謝原粒奉送)

笑話一則：今早排隊坐車，我見冇位，按慣例企埋一邊讓後面d人上車，見站頭有個西裝友，見人就點頭及擺手示意人群上車，心想巴士公司咁好服務？派個站長維持秩序？點知架車冇位再上客，個西裝友令轉面又笑笑口咁走去龍尾排隊
原來我誤會咗，嗰個係乘客唔係站長
查實呢個車站一直都冇站長值班，我今早以為係新服務，嗰西裝友又惾惾哋咁又背住我企喺站頭，我眼見佢等哂四方八面d人上車，到自己咪冇位囉，佢走番去龍尾排隊是否笑自已惾呢？還有呀，尊貴嘅男士們，最好唔好著全黑西裝呀！好容易被我呢d盲毛誤會架！

酸辣湯–主題日晚餐~上海晚餐

我通常編排玩煮飯仔時間表為：星期一至四煮吓自家簡單晚餐；星期五大多煮什糧，我哋冇咩飯引，大佬例外，他正是一個大飯桶；星期六自由日，各自搵食，即係我嘅一人前/孤獨老人餐；每星期煲一次老火湯，通常安排星期日，飯餸豐富些，多數有骨落地，譬如有魚食吓，回饋給眾大哥大/大姐大，無謂打咁多斧頭…(哈哈)

繼上回馬來西亞晚餐，麵包雞配肉骨茶之後，小姐好like即時order羅宋湯，本想安排西式晚餐；昨晚跟小姐講開很久沒有吃上海粗炒，於是今晚配多個酸辣湯，又演變成上海晚餐

上海粗炒呢，要配埋豆瓣醬一起吃，才發揮出味道，今晚小姐滿心歡喜又比咗like，要追加生煎飽、鍋貼、小籠飽，仲話隨後嘅星期五，為我們官方主題晚餐日喎

即時啟動創意，要多參考食譜，滿足吓個主題日啦

9月19日(星期五)主題日晚餐：上海粗炒、酸辣湯

酸辣湯材料：木耳、竹筍、冬菇、硬豆腐、薑、雞蛋1隻
調味料：黑醋、辣豆瓣醬、清雞湯、鹽

材料全部切絲、汆水，撈起瀝乾
先熱鑊，用油爆香薑絲，加木耳、竹筍、冬菇及辣豆瓣醬爆炒，灒酒
加清雞湯及水(比例我通常1份雞湯配1份水)，煮滾後，加鹽及拂勻的雞蛋拌勻，埋生粉茨調至湯羹濃度，最後加黑醋即可(醋要埋好茨後才加入，否則會影響湯羹濃度)

檳城白咖哩即食麵

前陣子，生果日報訪問馬來西亞檳城食麵達人，佢推介當地top 10即食麵，我之前試過其中有款檳城白咖哩即食麵相當唔錯，屋企有pack存貨送咗比B媽，經達人推介後，行咗兩日超市都冇貨返

今日可以買到檳城白咖哩即食麵，我入咗兩包儲備，經馬來西亞達人推介後，高級咗，加價了

今晚小姐約咗朋友食放題，煮個檳城白咖哩即食麵+豆卜嘆，我個人好簡單又易滿足，只係用咗半份醬料，個豆卜吸收哂d湯料… 正呀

美中不足是獨欠海鮮，下回買齊配料好好享受

呢款麵有3包配料：咖哩醬、調味粉、奶粉

水餃雲吞

打完風家居附近個街市都好似冇咩心機做生意咁，賣嘢個姐仔比咗d厚嘅餃子皮我，以往半斤可包70多隻，今次只得57隻

我同小姐非常喜歡韭菜餃，今次d皮咁厚，唔知會否影響銷路？明天同佢檔主講以免下手又搞錯

今晚想食蠔仔飯，配個韭菜煎蛋，非常惹味，我同小姐都有添飯呀

整好雲吞水餃做儲備，韭菜餃通常要嚟煎，雲吞呢，我哋比較喜歡小雲吞
今晚水餃及雲吞包咗成百隻，好似做咗水餃皇后呀

颱風餐

颱風海鷗飛走了，打風緊係要食午餐肉、豆豉鯪魚、沙甸魚、茄汁豆啦，冇錯相當懷念以往打風家家戶戶開罐頭食物的日子，打風應當順應民意開吓罐頭應酬下班大帝

耐何我個人又唔多喜好罐頭食物，家下交通運輸網絡發達，而住所附近必有超市營業，瓜菜已昨天預備好，今晚都係食雪櫃d存貨，罐頭特餐留待下回

9月16日(星期二)晚餐：榨菜木耳粉絲炒節瓜、紅棗雲耳蒸雞、蒸鱲魚
sorry呀，今晚冇開罐頭呀

芋頭鴨

呢幾日天氣悶熱，酷熱天氣下都唔想出街，隨後兩天有颱風會冇魚返，今日買咗條鱲魚+梳囉魚補倉

芋頭鴨是係家母傳承及我家至愛，我煮完隻鴨，佢哋話好美味呀，快d斬件啦，斬完隻鴨+煮埋個鱲魚煮津白，佢哋已每人吞咗兩碗冬瓜羹…等緊我(一家之煮)埋位食飯，而我習慣一路煮餸跟手清潔用具，煮完呢，例必清潔埋個d廚具及爐灶

題外話，家陣我煮完餸，大多數都係相機食先，佢哋都有投訴架，所以要好快手咁煮完立刻拍照，我d小家庭作業，廚房個位置又細及燈光效果唔多好，用嘅都係普通碗碟煲筷，有好多新嘅都未用，煲湯煮羹，大多數原煲上枱，自古至今都係咁，真係失禮

9月14日(星期日)晚餐：津白炆鱲魚(今晚煮咗半條鱲魚，餘下魚尾存倉)、芋頭鴨、冬瓜羹

材料：鴨1隻、芋頭1個、薑片、乾蔥粒
調味：南乳1磚、蠔油、老抽、冰糖碎各3湯匙、紹興酒2湯匙

鴨去內臟，洗淨，剪去鴨尾棄掉，用2湯匙老抽塗勻米鴨表面上色
芋頭去皮、洗淨，切厚件(約半吋厚)，用油煎成金黃色，備用
鑊燒熱下油1茶匙，用慢火將米鴨香煎至金黃色備用
鑊燒熱下油2湯匙，下薑片及乾蔥粒用慢火爆香，加入南乳炒勻，下紹興酒略爆炒，加入清水5杯及其餘調味料煮溶，放入鴨及排入芋頭件，煮滾後，轉慢火燜約1小時(期間將鴨兩面交替反轉，使鴨身受熱均勻)，關火焗約10分鐘，取出荔芋鋪在碟上，鴨斬件，排於芋件上，鴨汁勾芡扒上面即成

我家母傳統做法
前一天或早上炆好鴨，鴨待涼後，連汁冷藏貯存，食用時做芋頭步驟，將鴨連汁放入鑊中翻熱，排入芋頭件，鴨汁剛浸過面(若鴨汁不足，可酌加開水)，用慢火燜約40分鐘，關火焗約10分鐘，取出荔芋鋪在碟上，鴨斬件，排於芋件上，鴨汁勾芡扒上面

馬來西亞風味晚餐-肉骨茶

昨晚預先做好老麵麵糰，今天用麵包機做個法包，我d隔夜咖哩雞翼有銷路啦，配多個肉骨茶，好地道嘅馬來西亞風味晚餐

小姐踏入家門已聞到陣陣肉骨茶味道，大讚正呀…好肚餓，個麵包裝唔哂d咖哩雞，我用碗另上，當佢見到個麵包雞咁small，O哂嘴，我問佢要不要煮個烏冬比你呀？佢話唔需要

我哋每人兩碗湯+個包外層我兩對分，個麵包外層脆皮，蘸上咖哩汁好正呀，食到飽飽，美中不足嘅係個肉骨茶我忘記落蒜頭

小姐已預定羅宋湯配法包，等我編排下西式風味晚餐

9月12日(星期五) 馬來西亞風味晚餐：麵包雞、肉骨茶
個肉骨茶用智能煲&法包用麵包機，今晚無火煮食，快靚正又滿足的一餐

肉骨茶材料：玉竹、龍眼肉、南棗各20克、當歸18克、肉桂、黨參、甘草各15克、川芎10克、北芪8克、白胡椒粒16克、丁香5粒、八角1粒、蒜頭10粒、陳皮2克、腩排500克、冬菇

茶餐廳風味晚餐

果然不出我所料，過了中秋家裡的月餅滯銷，嚟緊日子我嘅麵包&蛋糕要停產，月餅將會係呢兩個星期嘅早餐/飯後甜品，睇嚟又增磅不少啦，唔敢上磅呀

but小姐竟然扥咗箱白桃果凍返嚟，鍾意食都唔洗咁吖！呢期佢係唔係痴咗？買親嘢都成箱

為求消滅d隔夜燒鴨，今晚按小姐要求煮個雪菜火鴨絲米粉，我呢個大佬7:30話返嚟食飯，個米粉當然唔係佢杯茶啦，冇預算煮飯，惟有加多個义燒炒公仔麵比佢囉，配多個清炒娃娃菜，大佬食哂成碟义燒炒公仔麵及加咗d雪菜火鴨絲，嗰度有2個麵架，我都配多碟菜比佢平衡番，佢只係食咗少許，怎樣告別三高呢

9月11日(星期四) 茶餐廳風味晚餐：清炒娃娃菜、雪菜火鴨絲米粉、义燒炒公仔麵

食品篇~茶葉飲料

食品篇~茶葉飲料

近年我都少飲茶及咖啡，但要有d放喺度看門口

普洱茶葉30g、老普洱150g/罐(未開封)
鐵觀音茶葉30g
綠茶葉80g、桂花綠茶葉150g/罐
2011國際游艇會(贈品)大紅袍40g(10g×4包)×2罐、鐵觀音40g(10g×4包)×2罐(未開封)
玄米茶包260g(5g×52包)+125g(5g×52包)
福建鐵觀音茶包40g(2g×20包)
精選名茶150g/罐(未開封)、鐵觀音茶包(贈品)40g(10g×4包)
杭州華陽翠眉125g×2罐(未開封)
咖啡伴侶1kg/包
UCC#114咖啡90g/樽、#117咖啡90g/樽
高麗太極人蔘粉100g/罐
決明子茶100g/罐
甘草鹹橘300/樽  

食品篇~麵食

盤點第三回：食品篇~麵食

麵食類是我家第二食糧，其一我哋冇咩飯引，其二亦是我嘅孤獨老人餐

即食麵類14種，要汆水(無調味)8種

先排列 top 10(即食麵類)
1.軟滑芝士辣麵1個(我嘅至愛)、芝士辣麵1個
2.合味道海鮮杯麵1個(必須要1個看門口)
3.福字麵1包(我嘅至愛)
4.福字米粉3個(我嘅至愛)、公仔雪菜肉絲米粉3個
5.Mdo Mie印尼撈麵1包/5個+2個(呢款好味)、喜達原味印尼撈麵1包/5個
6.豬骨湯味烏冬1包/2個(小姐至愛)
7.辛辣麵4個(大佬至愛)
8.元祖雞麵2個(小姐至愛)
9.智利磨菇長通粉1包、雙重芝士螺絲粉1包(小姐至愛)
10.關東麵1包/5個(小姐至愛)
*(檳城白咖哩麵缺貨，呢個可取代辛辣麵)

壽桃牌蝦籽麵7個、蝦籽麵2個(B媽送贈)
壽桃牌鮑魚雞味伊麵1包/2個+1個
壽桃牌鮑魚雞味湯河3個
壽桃牌鮑魚雞味粉絲1個
壽桃牌蕃茄麵7個
壽桃牌優質光身麵1包/5個(無調味包)
壽桃牌稻庭烏冬1包/4個、扁烏冬1包/4個、阿信屋烏冬1包/4個
台灣新竹米粉3個、糙米粉1包/5個
金粉陽春麵1包/4個
菠菜刀削麵1個
蜆殼粉1包、扁意大利粉1包
粉絲2個、泰國粉絲1個

食品篇~糧油醬料

盤點第二回：食品篇~糧油醬料

盤點清單寫滿1張紙

未開封的都有25項

未開封的醬料共25項，其中蒸魚豉油及蘋果醋被遺忘了

米醋(水、糯米、酒、地瓜)，白醋(水、米)成份唔同
謹記在心用完先入貨(啲種類多到好似開超市咁)
1.花生油900ml×3枝+50ml/枝(贈品)、麻油300ml/枝
2.日本豉油1公升/枝、蒸魚豉油750ml/枝、頭抽150ml/枝(贈品)、印尼甜醬油135ml/枝
3.米酒745ml/枝、廚用花雕酒640ml/枝、玖瑰露酒40ml×4枝(10元4枝覺得抵買)
4.蘋果醋650ml/枝、甜醋600ml/枝、米醋600ml/枝、白醋500ml/枝、調味紅醋(浙醋)207ml/枝、5.壽司醋300ml/枝
6.蠔油255mlx4樽(贈品)
7.茄膏170g/罐
8.清雞湯1公升×2盒
9.蕃茄醬500ml/盒、蕃茄意粉醬200ml/樽、白汁240ml/包
10.粗鹽454g/包、幼鹽454g/包
11.片糖454g/包、黑糖454g/包
12.生粉454g/包
13.沙津醬470ml/樽
14.沙茶醬200ml/樽
15.XO醬90g×2樽、XO醬辣椒醬100g×3樽、潮州辣椒油200g/樽
16.午餐肉340g×2罐+198g/罐、雞肉午餐肉198g/罐(大佬至愛)
17.粟米湯380g/盒、粟米粒380g/盒+432g/罐(買嚟炒粒粒，小姐very like)
18.磨菇粒115g/罐
19.辣椒沙甸魚125g/罐
20.豆豉200g/樽、雪菜200g/罐、木耳榨菜絲70g/包、台灣麻辣腐乳1樽
21.調味雞汁10g×2包(贈品)、醬爆牛仔骨醬80g/包、蒜蜜醃醬60g/包、日本昆布麵豉400g/包
22.蝦羔300g/磚(今年未食過，*仲有1小塊在雪櫃)
23.鮑汁螺片2罐(今年未食過)
24.紅豆茸350g/包、花生醬20g/盒+227/樽
25.發糕粉200g/包、木薯粉500g/包、糯米粉500g/包、低筋粉500g/包
26.朱古力粉500g/包

已開封18項(沒有拍照)
花生油、麻油、廚用花雕、生抽、甜豉油、美極醬油、印尼甜醬油、魚露、鎮江醋、蠔油、茄汁、粗/幼鹽、白砂糖、黃糖、冰糖、生粉、雞粉、胡椒粉、胡椒粒
大地魚粉、日本昆布木魚粉、蝦籽
高筋粉、低筋粉、木薯粉、糯米粉、粘米粉、亞麻籽、奶粉、泡打粉、古士粉

10分鐘開飯

一連幾天飲飽食醉，昨晚除咗消滅咗個例湯及魚外，剩底d餸菜及飯，今晚嚟個快靚正晚餐，炒飯+翻熱隔夜南乳粗齋，不用10分鐘就可以開餐

排期處置燒鴨：小姐要求雪菜火鴨絲炆米，咖哩雞翼：我預算用麵包機做個包，挖空個包，放d咖哩雞在裡面=麵包雞，燒肉存倉，for緊急應變措施：鹹酸菜炒燒肉

各位大姐大佬，我花點心思，唔好以為我慳返d買餸錢及打斧頭呀

9月10日(星期三) 一人前晚餐：翻熱隔夜南乳粗齋、炒飯

青紅蘿粟米湯–例湯

今日去街市買餸，個街市好似休息日咁，得1檔魚、幾檔菜檔開市，連豆腐檔都冇開，想買條魚煮天津紹菜都冇得選擇

呢個街市過時過節會推出石班、龍躉、龍蝦嗰d貴價嘢出嚟，真係識飲識食又識嘆
惟有買舊大魚腩+切開大佬拎反嚟嘅鹹魚做個鹹鮮鴛鴦蒸魚啦

昨晚食剩咗d燒肉+燒鴨拎咗反嚟，要清理一下個雪櫃，於是剿哂冰格d雞腳+燒豬手出嚟，正好配合煲個青紅蘿粟米例湯，煮個薯仔蚊雞翼，消滅埋嗰d檳城白咖哩汁配多塊日式咖哩磚…perfect，再煮個南乳粗齊，消滅埋個素鵝，一出一入又餵飽個雪櫃啦

9月9日(星期二) 南乳粗齊、薯仔蚊雞翼、鹹鮮鴛鴦蒸魚、青紅蘿粟米湯
今晚樣樣餸都好濃味呀

超豪盤菜宴

昨天行程緊湊，晨早6點起床準備拜祭祖先物品

適逢十五，見素食館已轉變社企營運，買咗個菠蘿咕嚕炒生筋，個人認為素食館改變後，食物更多樣化及選擇，素食館更劃分小部份位置為散客區，整體滿意

個菠蘿咕嚕炒生筋好味

回家途中，專誠去買點馳名燒臘，一出地鐵站已被蚊子叮咗3口，返歸立刻洗澡及處理好 d食物，拎埋罐鮑魚及加點生果去老大家開餐

呢樹嘅燒鴨係我家人至愛，頂呱呱

9月8日(星期一)晚餐：相當豐富
有拜神燒肉及雞、自加罐頭鮑魚，我買嘅燒鴨+燒豬腱，老大訂咗個鴻星盆菜，B媽又買咗魚、蝦、帶子、生菜及菜芯
老大總是話唔夠餸食，一路食一路開鮑魚，今晚我哋大小共16人，食咗5罐鮑魚呀！

個盤菜好味

飯後我哋每戶攞d唔同品牌月餅+生果出嚟併埋做甜品，又互相交換吓咁

嘆完，接著當然喺去嘗月啦，沿途由商場行去公園都好多人，小朋友玩佢哋嘅電燈籠+營光捧，論氣氛大家都認為傳統爉燭燈籠好玩d，尤其是那個頑皮大佬，每次玩到最後呢…都要火燒燈喎，冇一次留番個完整比我架，是晚各人盡興回歸

我前晚訓得2粒鐘+這兩三天東奔西跑買嘢過節，回家淋浴後便倒頭大睡了

沿途由商場行去公園都好多人

繼續13斤

呢兩日都好忙，買生果都要走兩轉，今日又13斤呀！

呢個芒果要20元呀！

1號風球，天氣不穩定，無謂出城，近近地在超市買咗4個橙、5隻蕉、1磅提子；再去埋生果檔買芒果、富有柿&柑+4隻雞翼、1隻雞肶

昨日右肩膀揹咗8個橙、2個金抽、3個桃，有點倦；今日掉轉，左手揹右手拎
回家分配好d生果

甘牌燒鵝

昨日買咗芋仔風乾，今晚預先浸好冬菇，接著洗淨隻雞用少許鹽醃好，準備明早拜祖先

今日做咗好多嘢好倦，預算食埋個福花椰菜+消滅d白咖哩汁，煮個薯仔炆雞翼

呢個大佬，7點話返嚟食飯，又惟有緊急應變計劃，將個薯仔分半滾番茄薯仔魚湯啦
佢又玩驚喜，買咗半隻甘牌燒鵝&滷水鵝翼返嚟，還有1條鹹魚添呀

都唔知好嬲定好笑，大佬佢又話有3高，又買埋d超標嘢番嚟食，仲話燒鵝要排隊添，見人排佢又排囉，條鹹魚係人哋送比佢喎

我橫掂都好倦，放埋半個薯仔落d湯度，個雞翼唔煮啦，條鹹魚存倉啦

9月7日(星期日)晚餐：炒福花椰菜，我用半碗水+磚日式白汁落去炒至收汁、甘牌燒鵝+滷水鵝翼，啲外賣嘢拎到返嚟已密密食啦，都冇拍照呀、番茄薯仔魚湯

練奶包again

再戰練奶包again

個麵糰好濕，整唔到形，唯有將佢擀薄，塗抹練奶，對半摺，割開3份，左摺中右摺中扭埋佢，but都好難，惟有亂咁放落個模算啦…冇法影相隻手好濕，只有製成品照片

13斤

今早又行咗出城掃貨

心想臨近中秋，貨品林廊滿目，市場各檔主勢必霸佔營業範圍通道，水洩不通，無謂拉架買餸車出去，只係帶咗個環保袋，一路行都 remind自已要謹慎理智，轉個頭買咗13斤嘢返嚟，人都癲！

買咗：橙(20元8個)、蘋果(10元3個)、泰國金柚(20元2個)、風水梨(10元3個)、桃(10元3個)、芋仔(8元斤10粒)，還有d應節生果未買齊…楊桃、富有柿、提子……明天繼續努力掃貨

為了買生果，早點出城多選擇，回程中午，好在秋意漸濃，右膀揹左手拎，冇上次左右手拎7斤嘢咁辛苦

點解要出城買嘢？店舖多，貨品種類多，價錢平囉，還有一樣最重要嘅係值得我住嘅地方學習嘅…人情味

話說生果檔嘅太子女嘅B囡剛滿月，太子女出返嚟舖頭幫手，嗰嗰顧客互相同佢祝福問候，整檔洋溢一片喜慶歡樂，搞到佢好似賣大包咁，d蘋果、風水梨&桃喺佢度買架，出面周圍都加哂價，起碼 double呀！

回程行經超市，d生果好似要搶咁

雪櫃篇

我家裡三格雪櫃爆哂啦

頂層為保鮮層，分4格，已開瓶調味醬料已佔1格，上：已煮熟食，中：蔬菜、下：已開瓶嘅調味醬料、底(保鮮抽屜層)：鮮肉、魚/需解凍肉食
中層是蔬菜格，但已被所有乾貨海味、藥材侵佔，我連 d豆類都放埋落去存放
冰格是推疊式，面層是冰皮味月餅、零碎肉件、肉丸…
冰格下層是包裝肉類、雪糕、冰鮮魚、冷凍食品…
冰格是全年常滿

上左：雪櫃上層，下左：雪櫃門存放區，右上：冰格上層，右中：冰格下層，右下：雪櫃中層蔬菜格

昨天挑起條筋話：詳盡報導吓雪櫃裡面的情況…今天玩咗半天清潔及盤點，做埋清單、磅重，瘋未？清單都有3張紙，圖片可能睇唔清楚，我要對住份list，keep in mind以後入貨要謹慎及理智

整理吓，驚覺上層保鮮格大小size樽/瓶裝醬料…共20件
有3樽薑醋、仁稔醬、蟲草雞精，被遺忘
仁稔醬是寶物嚟架，當我打開瓶的一剎那，立刻挑一小口放在嘴裡，追憶當年與母親一起製造此醬的情景…
為何有蟲草雞精呢？係朋友送贈，我哋又冇人鍾意飲；我就發揮我嘅小宇宙，用嚟醃肉或雞，每次用1小茶匙，用剩咗少許喺度
至於薑醋呢…大嗰樽放咗喺雪櫃都唔記得咗，其餘2瓶都係汁嚟架；查實我每年都會煲薑醋過年，舊年冇煲，每煲薑醋都會扣起d汁備用，又唔記得剩咗嘅度
那瓶檳城白咖哩醬，我大多數係食即食麵時只落半份醬料及調味料，扣起用嚟煮薯仔雞翼，好好味架。家陣超市都時常缺貨
麥芽糖，係小姐買番嚟夾餅乾，佢玩咗兩件剩咗喺度

冷凍格保鮮格呢，菜脯都有3款；買咗雲吞皮、蝦及雞，想整沙窩雲吞雞，冇做到，隻雞留番中秋節啦！
扣咗起d鹹魚頭及骨要嚟滾湯又冇做到，放咗喺度

中層保鮮格d乾貨海味，林林總總…共70款
紅棗都有4款，豆類有12款
賀年糖果(糖蓮藕、糖蓮子、糖馬蹄、糖薑)都有7包。點解咁多？近年冇擺糖果盒過年，都係買包樣樣齊嘅原包放喺度，家母又要每個家庭放包喺度過年(有甜頭喎)，他們例必過完年後拎番比我；還有大姐總喜歡買包糖蓮子嚟拜年；又要包糖蓮子+糖年藕嚟拜祖先。過年後呢，我將d糖果+栗子+雞蛋嚟煲糖水，漸漸演變成邊個生日呢，我就煮呢款糖水，佢哋話係…生日糖水。今年過完年後d糖蓮藕、糖薑＆糖馬蹄減價入d咗貨，糖薑要嚟冬天放落暖杯焗茶/紅棗茶軀寒又好有益架
嗰包d親戚嫁娶比嘅荔枝乾、龍眼乾…得閒都要消滅咗佢，我又唔多鍾意食，放埋落去煲糖水唔知是否合味道呢？

最後到冰格，首先要清嘅喺石崇魚、牛鰍魚及魚翅2包(最快都要冬至用嚟煲湯)
湯丸，自家制嘅蕃薯丸子+街外嘅麻蓉湯丸pack埋咗一盒(中秋節食d啦)
雪糕有2盒半，今晚食咗半盒，but轉頭入咗一盒冰皮月餅落冰格，小姐佢話每日可以食3粒喎！

總結，呢個雪櫃喺2011年進駐我家，我們每天都餵飽你，thank you so much為我們服務！
一編雪櫃都咁多嘢寫…昏倒了！

我嘅玩具(廚具、烘焙用具)篇、食物篇…coming soon

智能煲開光

上星期扥咗個智能煲返嚟

今晚開光煲咗個蘋果湯

慣常用咗平常明火煲湯份量嘅水，我用煲粥功能只需25分鐘，然後reheat15分鐘，味道不及明火好
好處勝在
1.快
2.慳燃料費(尤其是煤氣)
3.唔需要睇火
4.夏天煲嘅話廚房冇咁熱
5.做耐煮嘢最好，如燜燒、炆燉…