黃豆黑芝麻麵包

傻傻吓過咗兩日，做咗個包，我做包喺初級班，今次加咗黃豆黑芝麻粉，滿意

小姐今日回歸，她真的愛回家
佢話呢：酒店房間冇冷氣，膳食是一般校園兩餸飯+蛋花湯，還有其中一天只派2個麵包去行山，天氣熱到呢佢只係食咗半個，好彩冇中暑喎！還好現在有高鐵，如要坐嗚鳴火車…真喺暈低呀，這個體驗真難忘呀！

陰公豬囉…其實只是你們這群被寵壞的Y世代的孩子享受慣吧！

蜆肉蒸蛋

我常說，如要吃精緻菜色，倒不如外出吃，在家當然是家傳菜，今晚其中一個蜆肉蒸蛋是家母傳授架，小姐食到笑咪咪呀！

7月31日(星期四) 炒菜芯、煎雞翼、蜆肉蒸蛋、冬瓜羹(瑤柱、冬菇)

蜆肉蒸蛋材料：
新鮮蜆肉4両(洗淨瀝乾)、雞蛋2隻、粉絲少許(浸軟，輕汆水，瀝乾切半吋長)
將蜆肉、粉絲用鹽、糖、胡椒粉撈勻後加生粉、麻油醃半小時
雞蛋加鹽打勻後加開水(比例是1：2，即1份蛋2份水)輕輕拌勻，隔走泡沫，倒入蜆肉、粉絲內拌勻
先蒸3分鐘用筷子輕輕攪拌(防蜆肉沉底)，蓋上保鮮紙/加蓋(防倒汗水)再蒸鐘10分鐘，加蔥花，熄火，焗10分鐘
*蜆肉要用新鮮的，急凍蜆肉嘅味道是完全兩回事

7月份家常便飯

平日飯餸比較簡單，星期天通常會煲湯

7月6日(星期日) 炒菜芯、香茅雞翼、蝦醬肉碎豆腐、淮山蘋果粟米紅蘿蔔湯 ，材料：淮山4片、蘋果2個、粟米、紅蘿蔔各1條、蜜棗2粒、瘦肉半斤

7月7日(星期一) 豆角什錦炒飯
昨晚有剩飯，買咗豆角，今晚炒飯，簡單又一餐，炒飯時啲熱氣上升隻手指仲痛呀

7月8日(星期二) 六度茄子、蟹柳蒸蛋
天氣好熱，參考GiGi姐嘅做法，翻板做個六度茄子，簡簡單單又一餐

7月14日(星期一) 麵醬煮豆角、煎午餐肉、日式蠔仔飯、番茄薯仔魚湯

呢個蠔仔飯，大佬食咗兩碗，原先佢話要午餐肉煎蛋，有蠔仔飯，就唔要蛋啦
近來都幾黑仔，今晚攞d魚仔出嚟，仲吉親手呀

7月15日(星期二) 腐乳通菜、洋蔥豬扒、蝦醬肉碎豆腐、冬瓜鱲魚仔湯
買唔到細條大眼雞，20元13條鱲魚仔分兩餐，今晚d餸菜好送飯，大佬又食咗兩碗飯呀

7月16日(星期三) 孤獨老人餐~福建丸韭菜餃配蝦籽麵，昨晚剩咗豬扒，渌幾條菜+個蝦子麵

前幾天經過北角，通常都會買QQ的福建魚丸，條馬寶道十室九空，嗰間椰子號落閘，門前張貼搬家告示，在同區前一條街，我不懂得甚麼地產霸權，只覺得懷念舊物。呢區你們有多少回憶呢？唔…out咗添！找到間鋪，買咗d調味料&新鮮椰絲

7月17日(星期四) 福建魚丸廈門麵線，又是孤獨老人餐 again

7月20日(星期日) XO醬炒椰菜粉絲、日式芝麻醬伴青瓜、腐乳蒸雞腿、芝士腸仔茄汁豆、蒸魚(撻沙)
連續食咗幾天孤獨老人餐，冇咩餸，做個芝士腸仔茄汁豆比大佬撈飯，佢哋話=打風餐喎
係咁架啦，我哋冇溝通又零交流，好似住咗劏房咁，冇法啦，全部都係雪櫃真藏嚟架

7月23日(星期三) 上湯浸莧菜、香芽煎雞扒、蜆肉蒸蛋、芫茜皮蛋魚尾湯
大佬喺度食飯，要三有，即有肉有湯有汁撈飯

7月23日(星期三) 冬瓜魚蓉羹、煎餃

7月24日(星期四) 翠玉瓜炒粒粒、冬瓜魚茸羹
encore咗個冬瓜魚茸羹，加個翠玉瓜炒粒粒，皆大歡喜

7月27日(星期日) 蜜味薑蔥炒雞、芋頭魚、粉葛土茯苓豬骨湯
我喜歡自家五柳甜酸汁配芋頭魚

7月31日(星期四) 炒菜芯、煎雞翼、蜆肉蒸蛋、瑤柱冬瓜羹

回禮

收咗B媽嘅攪拌器，星期日佢又請飲茶，我都不感怠慢，趕快出咗上環買紅棗回禮

d紅棗好大粒架

路經獅子銀行正想辦點事，望吓入面都冇10個人排隊，阿大姐已經企喺門口截隊，這間上環分行真有效率4:30已經唔同你玩

接著行吓鹹魚街，條行人路又窄又多手推車，每行兩步呢，拆樓起樓地盤在你前後，鬱悶焗速，搞到冇咩心情，買咗紅棗就返歸

回程路經灣仔碼頭，驚覺碼頭已搬遷，附近地方翻天覆地動工改變，去完動漫節 d人潮要穿越在地盤中間用鐵馬隔開嘅行人路出嚟步行散隊，當天又熱又曬又大塵，真喺暈得一件件…

那怕若干年後…在回龜廣場也可以行路過對面海了…？

小姐join咗遊學團星期四回港，喺上環買完嘢，外賣鳳瓜排骨飯作今晚一人前餐

蜜味薑蔥雞

呢個蜜味薑蔥雞係家母每當過時節，為免浪費食物，將拜神雞變上菜，佢好花心思用瓦煲全程製作原煲上枱，而我呢…天氣咁熱，shortcuts用鑊快炒慳水慳力，若有靚靚嘅港女煲做這個菜都唔錯架

材料：熟雞、薑片、乾蔥4粒(切片)、蔥(切段)
調味：水半碗、蠔油、生抽各1湯匙、蜜糖1茶匙
燒1湯匙油，先爆香薑片，再放入乾蔥及蔥白炒勻爆香，將已斬件的雞整齊的排放在薑蔥上，沿鑊邊灒入紹興酒及調味料，蓋上蓋，改用慢火煮3-5分鐘把雞翻熱，最後撤下其餘蔥段快手炒勻上碟
家母做法：大火燒熱砂鍋，燒1湯匙油，先爆香薑片，再放入乾蔥及蔥白炒勻爆香，將已斬件的雞整齊的排放在薑蔥上，沿煲邊灒入紹興酒及調味料，蓋上蓋，改用慢火煮3-5分鐘把雞翻熱，放上餘下蔥段加蓋，熄火，上菜前把砂鍋再煮熱，焗約3-4分鐘

豉燒豬拖地

昨天一早煲咗粉葛土茯苓豬骨湯，跟住去荃灣探爸媽，兩個鐘頭內荃灣風雲色變，先是小雨，跟著大雨，接下行雷，雷響後，天色轉晴又暗有小雷響，期間在山上望向港島方向，陽光普照，趕快搞妥返歸

回程跟老大飲茶，剩咗啲銀針粉、紙包骨、豉燒豬拖地帶回家晚餐

大家估吓豉燒豬拖地喺咩

老點家老菜

昨天B媽請飲茶，叫咗好多老點家老菜，味道還可以，唔錯！

令我懷念兒時跟爸爸帶我們到茶居的歡樂時光

爸！還想那時經濟緊迫，每當你出糧的日子，你總喜歡帶我們到舊居附近的餐室high tea你嘆
你嘆著奶茶+菠蘿包，大佬呢，喜歡飲汽水。老爸嘅創意無限，總為我們order忌廉+鮮奶，但那個頑皮的大佬，每當用飲管吸吮到樽底時定必吹泡泡玩樂一番，還叫我跟著他玩，當時我比較單純(即喺蠢囉)，回家總會拉肚子，還要老媽服侍我這個小弱女呢

你疼愛我，避免我被大佬戲弄及令老媽生氣而改變到茶居嘆一盅兩件，令我刻骨銘心

爸！昨天我帶咗你至愛嘅叉燒包嚟探你呀！

亞麻籽肉鬆包

消滅咗個綠茶芝士蛋糕，星期六都冇煮飯，用中種做咗兩個麵包，同樣放d亞麻籽，小姐要求加肉鬆，成功出爐，佢吞咗個包，都冇影底內饀

圖左亞麻籽包                   圖右肉鬆包

中種材料：高筋粉140g、水80g、酵母1.5g、奶粉4g、鹽2g
先將酵母溶於水，再加入高筋粉、鹽、奶粉搓至柔滑，放入雪櫃17小時

麵糰：高筋粉60g、亞麻籽6g、水50g、酵母半茶匙、糖20g、鮮奶油40g、鹽2g、肉鬆20g
將麵糰所有材料混合(除牛油/肉鬆)搓至有柔滑；加軟牛油搓至可伸延薄膜；中途將中種一邊剝碎一邊加入(可用攪拌器/廚師機/麵包機攪拌，溫度控制在24-26度)
用保鮮紙包發酵30分鐘，取出分割2份，滾圓；靜置20分鐘
做形：將其中一份麵糰搟成長方型，卷起放入吐司模；另一份麵糰搟成長方型加入肉鬆，卷起放入吐司模，最後發酵約45分鐘，入爐前先塗蛋水
以180度入爐焗約25分鐘至金黃

經典馬卡龍

小姐第一次整愛甜的傑作，佢好開心呀，值得讚賞是拍攝效果比我好，我要努力改進

昨天小姐狂吞佢嘅馬卡龍，飽飽！隔夜餸 = 我嘅孤獨老人餐
小姐今日happy，去咗動漫節及二記掃貨，嚟緊唔知玩d咩？
那個邪惡的綠茶豆腐芝士蛋糕，睇嚟要內服+外敷(滑滑)

冬瓜魚蓉羹

是日大暑，響應煲冬瓜

材料：冬瓜1斤(刨絲)、大魚腩1個、蟹柳3條(切絲)、本菇隨意(切粒)、薑2片、蔥(切粒)
爆香薑片，放入大魚腩兩面煎香，灒酒，加入滾水，大滾後收慢火煮10分鐘
撈起魚腩、薑片，放入冬瓜茸及本菇煮10分鐘
將魚腩去骨起肉，放回鍋內，然後加入蟹柳一同再煮滾，灑上蔥粒即可

綠茶豆腐芝士蛋糕

食完飯小姐玩咗個綠茶豆腐芝士蛋糕，知佢志在玩及貪快，預先蒸咗件豆腐隔水，點知佢用個攪拌器攪忌廉芝士時d漿飛哂出嚟，做嘢唔喺咁架，又要我事後清潔，擺咗個攪拌器落d忌廉芝士先開機，開機時要用慢速，仲有呀，做餅、蛋糕&麵包喺有份量架，目測及靠估，個cake咪唔凝固囉

昨天個綠茶豆腐芝士蛋糕，失敗咗，其貌不揚，味道ok，有待改進

餅底材料(6寸蛋糕模)：消化餅40克、牛油80克
消化餅壓碎，用熱水座溶牛油，加入消化餅碎拌勻，放入模內，用匙羹壓實，放入雪櫃冷藏30分鐘至定型

綠茶豆腐芝材料：蒸煮滑豆腐/盒裝豆腐花1盒、忌廉芝士150克、淡忌廉100克、糖40克、魚膠粉2茶匙、綠茶粉2茶匙

先將豆腐隔水蒸2分鐘，取出瀝乾備用
忌廉芝士室溫放軟後加入糖用膠刮拌勻，加入豆腐再拌勻
淡忌廉用電動打蛋器打發7成(約5分鐘)
魚膠粉放入3湯匙凍開水拌勻，再用熱水座溶
將2湯匙淡忌廉拌入魚膠溶液內
將豆腐芝士漿、已打發的淡忌廉及魚膠溶液拌勻，倒入蛋糕模內，預留100克混合綠茶粉舖面
，放入雪櫃冷藏至少3小時至凝固才可脫模

錯誤1：過分攪拌，蛋糕欠缺軟滑，錯誤2：材料分量不足，錯誤3：綠茶面層分量不夠及不平滑

餃子

今日做咗好多嘢，去買料包餃子及預算做檸檬芝士蛋糕，喺超市，好似遊魂咁，完全冇回事，掛住雞翼凍肉補倉，返到屋企先發覺冇買忌廉芝士
嘆完個米粉，見天色灰暗，唔想再出街，但小姐星期日買咗1公升忌廉玩雪糕，剩咗d忌廉我怕變壞，小姐話烘焙店忌廉芝士平個超市，想慳嗰一個幾毫，惟有行路出城，去買忌廉芝士
好似大鄉西里出城咁，沿途買買買…大眼雞仔、蜆肉、大頭菜、薑、莞茜、紅蔥頭、菜芯

d魚處理分放好，存放冰格冷藏

本應掃完貨可步行回家，就係要等大叔開蜆肉囉，行出街市，已經下雨，急步快行，行雷大雨，需然有帶雨傘，都要坐1站車回家。返到屋企黃雨、紅雨、雷步警告有齊

材料：梅瘦肉1斤、椰菜1個、餃子皮1斤、木耳、紅蘿蔔粒隨意
瘦肉用鹽、糖、生粉、胡椒粉及麻油調味，放入雪櫃冷藏2小時，椰菜洗淨切碎，灑1茶匙鹽，放置5分鐘，搾乾水份後與已調味的瘦肉拌勻，即可包餃子

快手處理餃子，預備晚餐，包餃子時小姐喺度攪攪陣，包到成隻糭咁大隻，圖右喺佢d傑作

蘋果乳酪蛋糕

昨天約咗外甥去書展，點知超多人，在入境處天橋已有廣播要排2小時。轉咗去中央圖書館，適逢日+暑假，又係多人，喺地下展館睇咗個話劇：反斗莫札特與僕人，小朋友開心，消磨咗大半天返歸

經過價好棧，因假日關係，多咗外傭shopping成間店都係人，看準目標快速買咗包黃豆芝麻粉、早餐麥片、鮮奶、紅糙米粉&黃糖，真係好生意

喺呢嗰地方，踏出門口，向左走呢強國人的世界，汽車廢氣多空氣勁差，選擇向右往公園走，全是外傭整個公園成為她們的主題公園，好不容易回歸家裡已7點，冇預算煮飯，點知人齊，已經迫到頭暈暈，唔想再出外食飯，唯有快手煮飯，有d相都冇影呀

早上做咗個蘋果乳酪蛋糕送比外甥

材料：雞蛋3隻、低筋粉90g、鮮奶80g、糖60g、橄欖油15g、蘋果3個
蛋黃加20克糖打至淺色及杰身，蛋白打至起泡，分3次加入餘下的糖，打至企身
蛋白霜與蛋黃糊混合後，把已過篩的低筋麵粉及牛奶分2次交錯混入蛋糊中，快速拌勻至無粉粒的麵糊
舀2湯匙麵糊和橄欖油拌勻，再倒入其餘麵糊一起拌勻(注意不要攪拌過度)，倒進模內
 將蘋果去芯後切開4份，然後切片(頂端不要切斷)，放在已拌勻的麵糊上
放入已預熱175℃的焗爐內焗約20分鐘

乳酪蛋糕(全蛋法)

昨晚清理食物櫃，發現乳酪快到期，趕快清倉，做個乳酪蛋糕，今次用全蛋法，效果依然鬆軟，好味呀

材料：低筋麵粉50克、高筋麵粉25克、雞蛋2隻、乳酪100克、糖40克、橄欖油15克、椰絲30克

雞蛋加糖坐熱水，打發至紋路不易散去

 

把低筋麵粉及高筋麵粉混合過篩，分2次交錯混入蛋糊內，然後加入乳酪及椰絲，快速拌勻至沒有粉粒的麵糊，舀2湯匙麵糊和橄欖油拌勻後，再倒入其餘麵糊一起拌勻(注意不要攪拌過度)

 

 倒進模內，入爐前在枱上敲幾下敲出較大的氣泡

 放入已預熱170℃的焗爐內焗約20分鐘

 出爐後取出放涼

Philips攪拌器

這個是用一包餓驚力黃豆換取之禮物，多謝B媽

常言道，貴嘢係唔同d架，嗰包餓驚力黃豆要成40元呀！好味！有好嘢食啦
我等緊你個豆漿機&電器大佬個煲呀

我喺上環見到好靚嘅大粒紅棗，要幾多包呀？加多幾包餓驚力黃豆，等我儲吓積分落訂換個電器大佬個煲啦！哈哈

亞麻籽麵包

亞麻籽麵包出爐啦

昨晚預先用麵包機做好中種，存放雪櫃，今天加埋主麵糰做呢個包，超軟熟，之前做包係放哂材料落麵包機一 take過，掌握不太好，參考仙姐嘅做法，試吓做，效果相當好，個包到現在都係軟架，中毒了，正在研究天酵，繼續做包

中種材料：高筋粉112g、水64g、酵母1g、奶粉4g、鹽1.5g
先將酵母溶於水，再加入高筋粉、鹽、奶粉搓至柔滑，放入雪櫃17小時

麵糰：高筋粉48g、亞麻籽5g、水40g、酵母半茶匙、糖16g、鮮奶油32g、鹽1.5g
將麵糰所有材料混合(除牛油)搓至有柔滑；加軟牛油搓至可伸延薄膜；中途將中種一邊剝碎一邊加入(可用攪拌器/廚師機/麵包機攪拌，溫度控制在24-26度)
用保鮮紙包發酵30分鐘，取出，滾圓；靜置20分鐘
做形：將麵糰搟成長方型，卷起放入吐司模，最後發酵約45分鐘
以180度入爐焗約20分鐘至金黃

日式蠔仔飯

材料：蠔仔半斤、米1杯
蠔肉湯底材料：醬油、味淋各1湯匙、木魚湯粉1茶匙、糖1茶匙、水4湯匙
做法：
1. 先把蠔仔沖洗乾淨、瀝乾備用
2. 把蠔肉湯底材料煮沸；然後放入蠔仔；再次煮沸後便可熄火，撈起蠔仔瀝乾，加麻油、胡椒粉及薑絲拌勻，保留湯底待用
3. 加入適量的開水於已煮蠔肉湯底中直至配合煮飯的份量
4. 把洗淨的米和湯底放入電飯煲內，當飯大滾至收水，把已調好味的蠔仔放回電飯煲內，繼續煮至飯熟，焗10分鐘，灑上蔥花即可

休閒日

昨天休閒hea咗日，中午飲茶，行陣街，同外甥share咗個下午茶，只是window shpping滿足

返歸晚上9點，下午都冇咩點個嘢食，煮個傻仔麵食吓，點知我用手撕開味粉嗰陣，成包粉飛哂落我身上，又要走去搞清潔，食個麵啫，都咁論盡

平日晚餐較簡單，預算蠔仔飯+豆角，大佬7點半通知返嚟食飯，即刻摷雪櫃，見有幾條鱲魚仔，滾個湯+午餐肉招呼個大胃王啦

題外話，我都幾婆仔，平日買餸，總喜歡留起一些，留待需要時用，好似今晚咁，變咗個魚湯出嚟囉！d魚仔滾湯好甜架，而家呢d魚仔，街市亞姐唔劏架，我通常買斤番嚟自己劏，分放好存放冰櫃，今天見到細條大眼雞好靚，明天掃貨

話說近來都幾黑仔，今晚攞d魚仔出嚟，仲吉親手呀

2014已經過咗半，所有不愉快的事情亦除之遠去，展望將來，lucky快來

Ho哥 Brithday

Happy Brithday to Ho哥

今晚去咗The Royal Pacific Hotel@Tsim Sha Tsui食Buffet

當然做個至愛嘅紅棗蛋糕比佢慶生啦，買咗個戚風模

做咗兩個